Համացանց

Քաղաքական գիտությունների դոկտոր, պատմաբան Արմեն Այվազյանի ֆեյսբուքյան գրառումը․ «Երևան-Բաքու պարբերական չվերթների մասին կառավարությունը պարտավոր է ամբողջական տեղեկատվություն տրամադրել հանրությանը. ո՞վ է մեկնում այդ չվերթներով, ի՞նչ հաճախականությամբ, ի՞նչ նպատակներով։
     «Զվարթնոց» օդանավակայանի մամուլի պատասխանատուի համաձայն՝ «Այո, տարբեր միջազգային կազմակերպությունների կողմից պատվիրած չարտերային չվերթեր դեպի Բաքու և Բաքվից Երևան իրականացվել են»։
     Ազգային անվտանգության տեսանկյունից սա անհեթեթություն է։ Մի՞թե ցեղասպան և հայատյաց Ադրբեջանի հետ բոլոր հարցերն արդեն կարգավորված են, որ Երևանից կարելի է ահա այդպես հանգիստ չվերթներ կազմակերպել։ Հնարավո՞ր է արդյոք պատկերացնել, օրինակ, Թեհրան-Թել-Ավիվ չվերթ։ Ո՛չ, որովհետև Իրանը և Իսրայելը թշնամիներ են։ Այսօր չեն իրականացվում չվերթներ անգամ ՌԴ-ի և Եվրոպական Միության պետությունների միջև, որոնք միմյանց հետ բացահայտ պատերազմի մեջ չեն և մեկը մյուսի տարածք չի զավթել։
     Բայց, պարզվում է, հանրությունից թաքուն Երևանից Բաքու և հակառակ ուղղությամբ ինչ-որ չվերթներ են իրականացվում։ Անտերություն ու խայտառակություն»։