Իրադարձություններ

ՀԱՊԿ-ը, որը ստեղծվել էր լրիվ այլ պայմաններում, ներկա իրողության մեջ ադապտացվելու անհրաժեշտություն ունի։ Այս մասին Հայ-ռուսական դիվանագիտական ֆորումին հայտարարեց դիվանագետ, արտակարգ և լիազոր դեսպան Արա Այվազյանը։ Նրա գնահատմամբ, կոլեկտիվ անվտանգության սկզբունքն ինքնին չի կարող դիմակայել մարտահրավերներին, քանի որ երկրներն ազատ են և յուրովի են ընկալում անվտանգության սպառնալիքները։ Այվազյանը նշեց, որ հակամարտությունների աշխարհագրությունը գնալով մեծանում է, կյանքն ինքն է ստիպում նախաձեռնել տարածաշրջանային նոր կոալիցիաներ, որոնք կկարողանան հաղթահարել ընդհանուր մարտահրավերները։ Խոսելով ռուս-ուկրաինական կոնֆլիկտի մասին, Այվազյանը որակեց այն «հյուծիչ պատերազմ», որը հիշեցնում է առաջին համաշխարհային պատերազմի ժամանակ ստեղծված վիճակը՝ անողոքաբար վերածվելով ռեսուրսների մրցավազքի։ Այվազյանը հիշեցրեց Ռուսաստանի Դաշնության նախագահ Վլադիմիր Պուտինի խոսքերը․ «Հետագա քսան տարիները լինելու են այնքան դժվարին, որքան՝ նախորդ քսանը»։