Հետաքրքիր է

Այս լուսանկարը, որը դարձել է դեկտեմբերի 7-ին տեղի ունեցած ողբերգական երկրաշարժի ինքնատիպ խորհրդանիշը, առաջին անգամ հրապարակվել է «Իզվեստիա» թերթի առաջին էջում։ Հենց առաջին ակնթարթից այն տարածվել է ողջ աշխարհում՝ ստանալով «20-րդ դարի Մադոննա» անվանումը։ Լուսանկարի հեղինակի՝ Մխիթար Խաչատրյանի պատմելով՝ լուսանկարի այս անվանումը տարածվել է այն բանից հետո, երբ ռուս ընթերցողներից մի կին, խորապես ազդվելով լուսանկարից, թերթի խմբագրություն էր ուղարկել իր գրած բանաստեղծությունը, որը վերնագրված է եղել «20-րդ դարի Մադոննա»։ Ահա այսպես Մարինե Նուռոյանը մարդկության պատմության մեջ մտավ «Հայկական Մադոննա» անվամբ։
     Գյումրեցի երիտասարդ կնոջ՝ Մարինե Նուռոյանի կերպարը, ով փոքրիկ դստեր հետ իր տան փլատակների տակ անցկացրել է մեկուկես օր և փրկվել, միլիոնավոր մարդկանց համար դարձել է ուժեղ կամքի և մայրական հերոսության աննախադեպ օրինակ։