Միջազգային

Վրաստանի երկու խոշորագույն առևտրային բանկերը՝ TBC Bank-ը և Bank of Georgia-ն (BOG), հայտարարեցին, որ Եվրոմիությանն անդամակցելու շուրջ բանակցությունները դադարեցնելու` կառավարության որոշումից հետո եվրոպական ճանապարհին այլընտրանք չկա։

«Կանգ մի առեք դեպի Եվրոպա ձեր ճանապարհին»,- ասվում է BOG-ի հայտարարության մեջ: TBC բանկը գրում է, որ աջակցում է ազատության և եվրոպական կուրսի համար պայքարող վրաց ժողովրդին և դատապարտում բռնությունը խաղաղ ցուցարարների նկատմամբ։

«Վրաստանի եվրոպական և եվրատլանտյան ապագան մեր երկրի բացարձակ մեծամասնության պատմական ընտրությունն է, որն ամրագրված է Վրաստանի Սահմանադրության 78-րդ հոդվածում։ Մենք հաստատապես համոզված ենք, որ եվրոինտեգրման ժամանակավոր կասեցումը հակասում է վրաց ժողովրդի կամքին և Վրաստանի Սահմանադրությանը»,- ասված է հայտարարության մեջ։