Առավոտյան ուժի մեջ կմտնի Իսրայելի ու Լիբանանի միջև հրադադարը
 Միացյալ Նահանգները ճնշում է գործադրում Իսրայելի վարչապետ Բենիամին Նեթանյահուի վրա՝ նախքան Գոհաբանության օրը` նոյեմբերի 28-ը, «Հեզբոլլահի» հետ հրադադարի համաձայնագիր ձեռք բերելու համար։ Այս հայտնել էր The New York Times-ը (NYT)՝ հղում անելով իր աղբյուրներին։ Կառավարության ղեկավարն ասել է, որ պատերազմը կավարտվի միայն բոլոր պատանդների վերադարձով։ Ըստ վարչապետի՝ Իսրայելին հաջողվել է հասնել «տպավորիչ արդյունքների» «Հեզբոլլահ»-ի դեմ պատերազմի ընթացքում, ոչնչացվել են զենքի մատակարարման ուղիները և շարժման ենթակառուցվածքների զգալի մասը. Նեթանյահուն հավելել է, որ իր հիմնական խնդիրն է` թույլ չտալ Իրանին միջուկային զենք ձեռք բերել՝ ընդգծելով, որ Իրանի դեմ պայքարը շարունակվելու է։ Իսրայելի վարչապետն ասել է, որ կառավարության հաստատմանն է ներկայացրել Լիբանանի հետ հրադադարի մասին համաձայնագիրը, որը մշակվել է Միացյալ Նահանգների աջակցությամբ։ Նա ընդգծել է, որ Իսրայելը իրեն իրավունք է վերապահում ցանկացած առաջխաղացման դեպքում ռազմական պատասխան տալու լիակատար ազատություն, և ԱՄՆ-ն համաձայն է դրա հետ։ Կառավարության ղեկավարի խոսքով՝ համաձայնագրի ժամկետը կախված կլինի բացառապես նրանից, թե ինչ է կատարվում Լիբանանում։ «Եվ մեզ վրա հարձակվելու ցանկացած փորձի մենք կոշտ ենք պատասխանելու»,- ընդգծել է կառավարության ղեկավարը։ Նա նշել է, որ Իսրայելը կունենա ռազմական գործողությունների լիակատար ազատություն, այդ թվում՝ Լիբանանում։ Ըստ Նեթանյահուի` ինքը որոշել է համաձայնության գալ «Հեզբոլլահ»-ի հետ մի քանի պատճառներով` իրագործած նպատակներ, «Հեզբոլլահ»-ի լուրջ թուլացում, Իսրայելին զենքի և զինամթերքի մատակարարման ընդհատումներ և այն փաստը, որ Իսրայելը կարողացավ «Հեզբոլլահ»-ը կտրել «ՀԱՄԱՍ»-ից: Իսրայելի նախարարների կաբինետը հաստատել է Լիբանանում հրադադարի մասին համաձայնագիրը, հայտնում է The Jerusalem Post-ը։ Այն ուժի մեջ կմտնի չորեքշաբթի` նոյեմբերի 27-ի առավոտյան ժամը 10-ին: |
