Համացանց

Քաղաքական վերլուծաբան Վարդան Բալյանի ֆեյսբուքյան գրառումը․ «COP29-ի շրջանակներում Իլհամ Ալիևի այսօրվա ելույթը յուրատեսակ պատմական էքսկուրս էր, որի ընթացքում պատերազմական հանցագործը, հայերիս և Ադրբեջանում բնակվող այլ ազգային փոքրամասնությունների նկատմամբ ցեղասպանական քաղաքականություն վարող բռնապետը քննադատում էր Ֆրանսիայի և Նիդերլանդների գաղութատիրական քաղաքականությունը:
     «Փարիզը դարերով թալանել է իր գաղութների բնական պաշարները։ Այս ամենից հետո ո՛չ Եվրոհանձնաժողովը, ո՛չ Եվրոպական խորհրդարանը, ո՛չ Եվրոպայի խորհուրդը Ֆրանսիային որևէ մեղադրանք չեն ներկայացրել։ Սա քաղաքական երեսպաշտություն է»:
     Եվրոպառլամենտը և Եվրոպայի խորհրդի պառլամենտական ասամբլեան անվանելով քաղաքական կոռուպցիայի խորհրդանիշներ՝ անպատժելիությունից լկտիացած ու տարօրինակ պատերազմում գնված հաղթանակից «նապոլեոն» ինքնահռչակված Իլհամ Հեյդարիչը ո՛չ ավել, ո՛չ պակաս պահանջել է ազատ արձակել Ֆրանսիայի բոլոր քաղբանտարկյալներին և խոստացել ապագայում ևս աջակցել եվրոպական գաղութատիրության դեմ պայքարող երկրներին:
     Ծափահարությունների պակաս, ըստ որում, կարծես չկար, եթե հաշվի չառնենք հանգամանքը, որ ծափահարում էին հիմնականում ադրբեջանցի կամավորները ու ալիևանման բռնապետիկների պատվիրակությունների անդամները:
     Ակնհայտ է, որ Հայաստանն Արևմտյան Ադրբեջան հռչակած ադրբեջանական տուզիկն իրեն վերջնականապես գելխեղդ է երևակայում, ինչը սրան առավել քան վտանգավոր է դարձնում: Խաղաղության մասին բոլոր խոսակցությունները այս ամենի ֆոնին Գյուլնազ տատու հեքիաթների շարքից են: Թշնամին պատերազմի է պատրաստվում ու այն սարերի հետևում չէ, ավելի ճիշտ՝ անմիջականորեն մեր սահմաններով ձգվող սարերի հետևում է»: