Համացանց

Ռեֆորմիստների կուսակցության խորհրդի անդամ Նատալյա Սաղիյանը ֆեյսբուքյան իր էջում գրում է. «Այս կինը` Սամանթա Փաուերը, առաջինն էր, որ վազելով եկավ Գորիս արցախցիների զանգվածային տեղահանումից հետո:

Եկավ, կանգնեց մարդկանց դիմաց և ՇԱՏ ԿԱՐՃ խոսելով այն մասին, որ էթնիկ զտումներն անընդունելի են, արագ անցավ փողի թեմային:

Մարդիկ տնավեր, հայրենազուրկ, ողբերգության ճիրաններով անցած կանգնել էին այս տիկնոջ առջև և ապշահար լսում էին, թե ինչպես է նա իրենց վիշտը գնահատում մեկ միլիոն ԱՄՆ դոլարի չափով:
     Սա խոստացավ մեկ միլիոն դոլար, որպեսզի արցախցիները հեշտ մոռանան իրենց հայրենիքը:
     Ամիսներ անց սա նորից եկել է Հայաստան:

Տիկին Փաուերը, հավանաբար, կեզրափակի ԱՄՆ-ի բարձրաստիճան պաշտոնյաների այցերի շարքը:
     Ասածս այն է, որ սրանք հենց այնպես չեն գալիս:

Առաջին երկուսն եկան Փաշինյանին սատարելու` ցուցարարներին վայրագաբար ջարդելուց առաջ և անմիջապես հետո:

Հաջորդիվ եկան սենատորները՝ ՀՀ ԱԺ զանազան պերսոնաժներին մեծահոգաբար ուսին տպտպացնելու և ժպտալու համար, միաժամանակ, Հայաստանից Ադրբեջանին կոչեր հնչեցնելու: Այդ կոչերը, ի դեպ, ոչ թե ՀՀ տարածքային ամբողջականությունը ճանաչելու մասին էին, այլ Ռուսաստանի հետ հարաբերությունների խորացման դեմ զգուշացումներ: Այդ կոչերով ԱՄՆ սենատորները Ադրբեջանին լեգիտիմ առիթ են տալիս Հայաստանի վրա ճնշումը ուժեղացնելու, քանի որ Հայաստանի տարածքից միջամտում են Ադրբեջանի ներքին հարցերին:

Հիմա էլ սա, փողի տիկինը, եկել է վերահաստատելու, որ փող կտա:
     Միայն ԱՄՆ-ի պաշտոնյաները կարող են անկեղծորեն մտածել, որ փողը կարող է փոխարինել հայրենիքը: Կարծում եմ, պատճառը այն է, որ այն մայրցամաքը, որտեղ սիրուն և ապահով տեղակայված է ԱՄՆ-ն, ժամանակին եղել է այլ ժողովուրդների հայրենիք, որը նրանց ձեռքից կարմիր ուլունքների դիմաց խլեցին, ում ցեղասպանեցին, հետո ում կարողացան գումարով համոզեցին, մնացածներին էլ ռեզերվացիաներում տեղավորեցին, որպեսզի նվաստացնեն և զրկեն հայրենիքի համար պայքարելու կամքից:

Երեսպաշտության սիմվոլ Սամանթա Փաուերը հիմա Երևանում է: Սպասենք, թե ինչպիսի նոր «կարմիր ուլունքներ» կառաջարկի ՀՀ Կառավարությանը էլ ավելի զիջող դիրքորոշման դիմաց»: