Միջազգային

Իսրայելի ընդդիմության առաջնորդ Բենի Հանցը, որը ՀԱՄԱՍ-ի դեմ պատերազմի սկսվելուց հետո դարձել է ռազմական կաբինետի անդամ, հայտարարել է կառավարության կազմից դուրս գալու մասին՝ Գազայի հատվածում հետպատերազմյան ապագայի վերաբերյալ վարչապետ Բենյամին Նեթանյահուի հետ ունեցած տարաձայնությունների պատճառով, հաղորդում է BBC-ն։

Ելույթ ունենալով Թել Ավիվում՝ Հանցը հայտարարել է, որ այդ որոշումը «կայացրել է ծանր սրտով»։ «Ցավոք, պարոն Նեթանյահուն խանգարում է մեր իրական հաղթանակին, որը կարդարացներ շարունակվող ցավոտ ճգնաժամը»,- ասել է նա։ Եզրափակելով իր խոսքը՝ Հանցը կոչ է արել վարչապետին նշանակել հաջորդ համընդհանուր ընտրությունների օրը, որտեղ ինքը, ինչպես սպասվում է, կդառնա գլխավոր ֆավորիտներից մեկը:

Նեթանյահուի արձագանքը չի ուշացել։ «Բենի, հիմա դուրս գալու ժամանակը չէ, հիմա ջանքերը միավորելու ժամանակն է»,- գրել է նա՝ X-ում։