Խնդրում ենք սպասել...

Միջազգային

Ռուսաստանը ցանկանում է արգելափակել «Վիքիպեդիա»-ն

20:30, կիրակի, 03 մարտի, 2024 թ.
Ռուսաստանը ցանկանում է արգելափակել «Վիքիպեդիա»-ն

Մարտի 1-ից Ռուսաստանում ուժի մեջ է մտել օրենքը, որն արգելում է գովազդը կամ արգելափակումը շրջանցող միջոցների հանրահռչակումը, որը ներառում է VPN ծառայությունները։ Այս մասին Պետդումայի պատգամավոր Անտոն Գորելկինը գրել է Telegram-ի իր ալիքում։

«Այժմ, այս օրենքով, Ռուսաստանի Դաշնությունում հնարավոր կլինի արգելափակել «Վիքիպեդիա»-ն»,- նշել է նա։
     Գորելկինն ուշադրություն հրավիրեց վիքի հոդվածի վրա, որը նկարագրում է արգելափակումը շրջանցելու ուղիները, ինչպես նաև խորհուրդ է տալիս օգտագործել այդ մեթոդները։
     ««Վիքիպեդիա»-ն արգելափակելու իրավական հիմքեր կան, մնում է ապահովել, որ դա օգտատերերի մոտ լուրջ անհանգստություն չառաջացնի»,- ասել է պատգամավորը։
     Նրա խոսքով, «բոլոր արժեքավոր տեղեկությունները, որոնք առկա են այս ռեսուրսի վրա, արդեն կրկնօրինակվել են, համապատասխանեցվել հանրագիտարանային չափանիշներին և տեղադրվել են Runet-ում»:
     Նա առաջարկում է անել այնպես, որ «Վիքիպեդիա»-ի հոդվածի հղումը բացելուց հետո օգտատերին առաջարկվի բացել դրա «անվտանգ տարբերակը` իր ռուսական անալոգներից մեկով»։
     Դրա համար անհրաժեշտ տեխնիկական լուծումն արդեն մշակվում է Ինտերնետ տեխնոլոգիաների տարածաշրջանային հանրային կենտրոնի կողմից, հավելել է նա։
     Ռոսկոմնադզորը բազմիցս տուգանել է Wikimedia Foundation ոչ առևտրային կազմակերպությանը, որը պահպանում է ենթակառուցվածքը «Վիքիպեդիա»-ի և այլ վիքի-նախագծերի համար։
     Հայցերի պատճառը նախագծի մերժումն էր՝ ջնջել Ուկրաինայում ռուս զինվորականների գործողությունների հետ կապված տեղեկությունները։
     Դեկտեմբերին Wikimedia.ru-ի ռուսալեզու Վիքիպեդիայի աջակցության համայնքը հայտարարեց իր փակման մասին։

2151 | 0
Facebook