Իրադարձություններ

Շիրակի մարզի Գետք գյուղի գյուղապետին աշխատանքից ազատել են հարցազրույց տալու համար, գրում է «Հրապարակ»-ը։ Մոտ 7 ամիս առաջ ՔՊ-ի կողմից գյուղապետ ընտրված Աշոտ Շաբոյանը պարզվում է՝ «վրիպել» է «ՕրագիրՆյուզ»-ի թղթակցին տված հարցազրույցում, որտեղ անդրադարձ էր կատարվել Ախուրյան խոշորացված համայնքի Գետք գյուղի խնդիրներին։ Լրագրողի հետ զրույցում գյուղապետ Աշոտ Շաբոյանը, խոսելով գյուղի խնդիրներից, մասնավորապես ասել էր. «Մեր գյուղի ամենամեծ խնդիրը կապված է գազաֆիկացման և ոռոգման ջրի հետ։ Սոցիալական խնդիրներ են, որի պատճառով մարդիկ կարող են լքել գյուղը»։

Գյուղապետը նաև նշել էր, որ սահմանամերձ Գետքը կդատարկվի, եթե գյուղի դպրոցը ևս փակվի։ Գյուղացիները համաձայն չեն, որ գյուղի դպրոցը միավորվի հարևան Երազգավորսի դպրոցին, և իրենց երեխաները կիլոմետրեր կտրեն դպրոց հաճախելու համար։

Աղբյուրի տեղեկություններով՝ Շիրակի մարզային իշխանությանը դուր չի եկել գյուղապետի անկեղծությունը և ազատման դիմում են պահանջել։ Աշոտ Շաբոյանն այս պահին իր ազատման մասին հրաժարվում է խոսել, սակայն չի հերքում, որ դիմում է գրել։

Ուշագրավ է, որ օրեր առաջ «ՕրագիրՆյուզ»-ի թղթակից Անահիտ Ղազարենցը գրառում էր արել՝ տեղեկացնելով, որ իր դեմ արշավ է սկսվել՝ Գետքի խնդրին անդրադառնալուց հետո։ Այսօր նա ևս մեկ գրառում է արել․ «Նիկոլի ժողովրդավարությունը....
     Գետքի գյուղապետին ինձ տված հարցազրույցի համար ստիպել են ազատման դիմում գրել։ ՔՊ-ական էլիտային դուր չի եկել, որ ճշմարտությունը ներկայացվել է։ Էնքան անհարմար եմ զգում, հիմա էդ տղան պտի մտածի իրեն փուռն եմ տվել, բայց էդտեղ միտում չի եղել։ Գետքի գյուղապետն օրերս ասում էր, որ իմ հարցազրույցի պատճառով խիստ նկատողություն է ստացել, ավելի ուշ կանդրադառնամ էս խայտառակ կինոյին»։