Իրադարձություններ

ԱԺ «Հայաստան» խմբակցության պատգամավոր Արմեն Ռուստամյանը լրագրողների հետ ճեպազրույցի ժամանակ ասել է, որ աշխարհաքաղաքական գործընթացներն ընթանում են Ռուսաստան-Արևմուտք հակամարտության տրամաբանությամբ և որ կռվի մեջ պետք է մեզ ճիշտ պահենք՝ այս կամ այն կողմից հարվածներ չստանալու համար. «Նախկին աշխարհակարգ այլևս գոյություն չունի, ուժն է որոշում. ով ուժեղ է, նա էլ իր կամքը թելադրում է: Մենք չպետք է էնպես անենք, որ էդ ուժերը մեր դեմ դուրս գան. էդ ճամբարներից որն էլ մեր դեմ դուրս եկավ, ունենալու ենք լրջագույն կորուստներ»: Ըստ պատգամավորի՝ մենք փոխում ենք ճամբարն այն ժամանակ, երբ ակնհայտ գոյություն ունի ՌԴ-Արևմուտք հակամարտություն. «Ճամբարափոխությանը կհաջորդի այն, որ այդ հակամարտության թատերաբեմ կդառնա նաև Հայաստանը. ամեն մեկն իր խնդիրը կփորձի լուծել՝ ՀՀ-ին օգտագործելով, ու մենք կդառնանք գործիք՝ սրա կամ նրա ձեռքում»,- ասել է նա: