Միլանի ակադեմիայի մանկապատանեկան ճամբարն արդեն երկրորդ օրն է` մարզումներ է անցկացնում Հայաստանում: Մարզաբնակ 160 տաղանդաշատ պատանի 10 օր շարունակ երկու հերթափոխով հնարավորություն կունենա մարզվելու աշխարհի լավագույն մարզիչների ղեկավարությամբ:
Ճամբարը Հայաստան բերելու նախաձեռնությունն Ամերիաբանկինն է: Այս գաղափարի շուրջ համախմբվել են Հայաստանի խոշորագույն ընկերությունները` ԶՊՄԿ-ն, «Տաշիր» ընկերությունների խումբը և Team Telecom Armenia-ն:
Ամերիաբանկի Մարքեթինգի և հաղորդակցության գծով տնօրեն Ռեբեկա Հակոբյանի խոսքով, ընտրությունը կանգ է առել մարզաբնակ երեխաների վրա, քանի որ թվաքանակի սահմանափակում կար, այդ պատճառով որոշեցին հնարավորություն ընձեռել հենց մարզերի երեխաներին:
Ճամբարի մարզիչները, թեև դեռ երկու օր է, ինչ աշխատում են երեխաների հետ, արդեն իսկ տպավորված են ու գոհ նրանց պատրաստվածությունից. «Հատկապես մեծ ոգևորություն կա երեխաների շրջանում, ինչն արդեն պարտավորեցնում է»,- ասում է ճամբարի մարզիչ Կլաուդիո Զոլան:
Լրագրողներին հետաքրքրում էր` արդյոք հնարավոր է, որ այս մարզումների արդյունքում որոշ տաղանդավոր երեխաների տանեն իրենց հետ: Ճամբարի համակարգող և կազմակերպիչ Լուկա Ամադեսին նշեց, որ այդ հարցը կարգավորվում է ՖԻՖԱ-ի կողմից. «Այժմ այդ հարցը բավականին խիստ է դրված, ու ըստ սահմանված կանոնակարգի, որևէ ֆուտբոլիստ իրավունք չունի խաղալ արտասահմանյան ակումբներում, եթե չի լրացել նրա 18 տարին»:
Մարզիչ Զոլան, սակայն, ասաց, որ եթե, այնուամենայնիվ, տեսնեն բացառիկ տաղանդավոր մեկին, գուցե հեռվից հետևեն նրա աճին և մարզչի հետ կապ պահպանեն. «Օրինակ՝ Ճապոնիայում նկատել էինք երկու տաղանդավոր ֆուտբոլիստի, մեկը 9 տարեկան էր, մյուսը՝ 12: Հիմա նրանք խաղում են երկրի բարձրագույն առաջնությունում: Տաղանդներին նկատելու դեպքում մենք տեղեկացնում ենք Միլանի ակումբին, որ այսինչ երկրում այսպիսի տաղանդավոր ֆուտբոլիստ կա: Թե ինչ կանեն այդ տեղեկատվության հետ, արդեն ակումբն ինքն է որոշում»,- ասաց Կլաուդիո Զոլան:
Ի դեպ, մարզիչները նշեցին, որ առաջին անգամ են տեսնում, որ ճամբարին մասնակցող տղաների ու աղջիկների թիվը համաչափ լինի:
Դեռ երկրորդ օրն է, սակայն մարզիչներն արդեն նկատել են տաղանդավոր պատանիների. թե ինչպես կդասավորվի նրանց կարիերան, ցույց կտա ժամանակը:
