Բաքուն արձագանքել է Արարատ Միրզոյանի հայտարարություններին
 Ադրբեջանի արտաքին գործերի նախարարությունը հայտարարություն է տարածել՝ կապված Հայաստանի ԱԳ նախարար Արարատ Միրզոյանի՝ երեկ տված հարցազրույցի հետ։ Հակառակորդի ԱԳՆ-ն մասնավորապես հայտարարել է. ««Արմենպրես» լրատվական գործակալությանը տված հարցազրույցի ժամանակ Հայաստանի արտգործնախարար Արարատ Միրզոյանը փորձել է ապակողմնորոշել և խեղաթյուրել Ադրբեջանի և Հայաստանի միջև բանակցությունների էությունը, խաղաղ համաձայնագրի նախապատրաստումը, սահմանազատման գործընթացը, ականային սպառնալիքը, ինչպես նաև տարածքային ամբողջականության ճանաչումը, ինչը բացարձակապես անհիմն է և անընդունելի: Չնայած Բրյուսելում հաջորդ հանդիպման վերաբերյալ ձեռք բերված պայմանավորվածությանը, ադրբեջանական կողմը համաձայնել է Պրահայում հանդիպման, ինչպես նաև ԵՄ խորհրդի նախագահ Շառլ Միշելի և Ֆրանսիայի նախագահների մասնակցությանը, ինչը, ցավոք, հանգեցրել է չարաշահումների բանակցությունների հաջորդ փուլում և Ֆրանսիան իրեն դրսևորում է որպես կողմնակալ և անարդար միջնորդ: Ի տարբերություն Հայաստանի, ադրբեջանական կողմը չի հրաժարվել առաջնորդների միջև բանակցություններից և հանձնառու է շարունակել դրանք Բրյուսելում ձեռք բերված պայմանավորվածության համաձայն»: Ինչ վերաբերում է սահմանազատման գործընթացի հարցին, ապա Ադրբեջանի ԱԳՆ-ն նշում է, որ ի տարբերություն Հայաստանի արտգործնախարարի հայտարարության, թե՛ Պրահայի, թե՛ Սոչիի հանդիպումների հայտարարությունները վկայում են այն մասին, որ սահմանազատումը նախատեսվում է իրականացնել տարածքային ամբողջականության և ինքնիշխանության ճանաչման հիման վրա՝ ՄԱԿ-ի կանոնադրության և Ալմա-Աթայի հռչակագրի համաձայն։ Ընդհանուր առմամբ, դիմումը ՄԱԿ-ի կանոնադրությանը և Ալմա-Աթայի հռչակագրին արվել է նշված սկզբունքների համատեքստում, և հայկական կողմը քաջատեղյակ է, որ այդ հանդիպումներում դրույթներ չեն եղել, թե որ քարտեզների հիման վրա է սահմանազատումն իրականացվելու: Սահմանազատման գործընթացը պետք է իրականացվի բոլոր իրավական նշանակություն ունեցող փաստաթղթերի վերլուծության հիման վրա: Ադրբեջանի ԱԳՆ-ն նշում է նաեւ, որ «Հայաստանի արտգործնախարարը հերթական անգամ թույլ է տալիս մանիպուլյացիաներ Ադրբեջանի տարածքից հայկական զինված ուժերի դուրսբերման հարցում»։ «Խորհուրդ ենք տալիս ԱԳ նախարարին այս հարցում իր դիրքորոշումը համապատասխանեցնել Հայաստանի անվտանգության խորհրդի քարտուղար Արմեն Գրիգորյանի և այլ պաշտոնյաների դիրքորոշմանը։ Ինչպես հայտարարել է Արմեն Գրիգորյանը, նախատեսվում էր հայկական ուժերը դուրս բերել Ադրբեջանի տարածքից այս տարվա սեպտեմբերին, սակայն դա դեռ տեղի չի ունեցել։ Ինչ վերաբերում է պարտավորությանը, թե ինչ ուժեր պետք է դուրս բերվեն Ադրբեջանի տարածքից, ևս մեկ անգամ հիշեցնում ենք, որ համաձայն 2020 թվականի նոյեմբերի 10-ի Եռակողմ հայտարարության 4-րդ կետի, նախատեսվում է Հայաստանի զինված ուժերի դուրսբերում Ադրբեջանի տարածքից և այս հարցում մանիպուլյացիաներն անընդունելի են, ասվում է հակառակորդի ԱԳՆ մեկնաբանությունում։ Նշվում է նաև, որ Հայաստանի արտգործնախարարը հարցազրույցում զերծ է մնացել Հայաստանի կողմից Ադրբեջանի տարածքային ամբողջականության ճանաչման հարցին դրական պատասխան տալուց։ Հայտարարություններն այն մասին, որ հայկական կողմից ականների տեղադրման և մարտական դիրքերի դեմ սադրանքների պատճառով այս տարվա սեպտեմբերին սահմանին տեղի ունեցած բախման հետևանքով Ադրբեջանը իբր օկուպացրել է Հայաստանի տարածքը, հիմք չունեն, ասվում է հայտարարության մեջ։ «Դա հակասում է ցանկացած տրամաբանությանը, որ Հայաստանը, որը գրեթե 30 տարի օկուպացրել է ադրբեջանական տարածքները, դեռ օկուպացիայի տակ է պահում Ադրբեջանի 8 գյուղ, ամբողջությամբ դուրս չի բերում իր ուժերը Ադրբեջանի տարածքից, շարունակում է իր ռազմական սադրանքներն ու ականային սպառնալիքները, մեղադրում է Ադրբեջանին. որ նա դիրքեր է զբաղեցրել չսահմանազատված սահմանին և դրանով իսկ խոչընդոտում է հանձնաժողովի աշխատանքը։ Չպետք է մոռանալ, որ 2020 թվականի Հայրենական պատերազմից հետո հենց Հայաստանն էր, որ երկար ժամանակ չէր արձագանքում սահմանները սահմանազատելու Ադրբեջանի առաջարկին», - ասված է Ադրբեջանի ԱԳՆ հաղորդագրության մեջ։ Ադրբեջանի ԱԳՆ-ն ընդգծում է, որ ստանձնած պարտավորություններից խուսափելը, Եռակողմ հայտարարության դրույթների սխալ մեկնաբանումը, ապակառուցողական գործունեությունը ոչ միայն չեն ծառայում տարածաշրջանում խաղաղության վերականգնմանը, այլ ուղղված են առաջին հերթին Հայաստանի դեմ։ |
