Քաբուլի օդանավակայանում նկարահանված տեսանյութը, որտեղ աֆղան ծնողները երեխային հանձնում են ամերիկացի զինվորներին, լայն արձագանք էր գտել համացանցում ու միջազգային մամուլում: Թե ինչ եղավ հետո, փորձել է պարզել Sky News-ի թղթակիցը՝ զրուցելով Մեծ Բրիտանիայի Պաշտպանության նախարար Բեն Ուոլեսի հետ: «Քաբուլի օդանավակայանում գտնվող զինվորները հրաժարվում են տարհանել անչափահասներին՝ առանց ծնողների: Զինվորները չեն կարող միայնակ վերցնել նորածիններին ու տեղափոխել: Եթե վերցնում են, ապա տեղափոխում են ծնողների ուղեկցությամբ»,- ասել է պաշտոնյան:
Independent-ի հետ զրույցում բրիտանացի զինվորականներից մեկն էլ հայտնել է, որ արտասվել են՝ տեսնելով ինչպես են ծնողները երեխաներին հանձնում իրենց: «Մայրերը հուսահատ էին, թալիբները նրանց ծեծում էին: Կանայք բղավում էին՝ փրկե՛ք իմ երեխային ու նետում էին դեպի մեզ: Նրանցից մի քանիսը նույնիսկ ընկան փշալարերի վրա: Ահավոր տեսարան էր»,- հայտնել է նա:
Օգոստոսի 14-ից սկսած Աֆղանստանից շուրջ 15 հազար մարդ է տարհանվել: