Թուրքիայի նախագահ Ռեջեփ Թայիփ Էրդողանն այցելել է Հյուսիսային Կիպրոս` 1974 թվականին Թուրքիայի կողմից կղզի ներխուժելու կապակցությամբ:
Հիշեցնենք՝ այսպես կոչած Հյուսիսային Կիպրոսի Թուրքական Հանրապետության ստեղծումը միջազգային հանրությունը չի ճանաչում:
Կիպրոսի հույներն Էրդողանի այցը կղզի սադրանք են որակել։
Էրդողանն ավելի վաղ հայտնել էր, որ հանդես է գալու կարևոր ուղերձով: Ակնկալվում է, որ Անկարան փորձելու է հասնել մի քանի երկրի կողմից թուրքական Կիպրոսի ճանաչմանը։ Հունական մամուլը օրերս գրել է, որ Պակիստանը, Ադրբեջանը, Լիբիան ու Բանգլադեշը պատրաստ են ճանաչելու թուրքական Կիպրոսը:
Նախորդ շաբաթ Եվրոհանձնաժողովի նախագահ Ուրսուլա ֆոն դեր Լայենը Նիկոսիայում կայացած մամուլի ասուլիսում հայտարարել էր, որ Բրյուսելը երբեք չի համաձայնի Կիպրոսում երկու պետություն ստեղծելու կարգավորման տարբերակի հետ: