Անօրինական կերպով թմրանյութեր ձեռք բերելու և պահելու մեղադրանքով Վրաստանում 20-ամյա մի կին է ձերբակալվել, հաղորդում է Վրաստանի ՆԳՆ-ը:
Հետաքննության տվյալներով՝ ձերբակալվածը հետագա իրացման նպատակով թմրամիջոցներն ստացել է Հայաստանից։
Վրաստանի ՆԳՆ-ի կենտրոնական քրեական ոստիկանության դեպարտամենտի, Հայաստանի պետական մաքսային կոմիտեի և ԱՄՆ արդարադատության նախարարության թմրամիջոցների դեմ պայքարի վարչության աշխատակիցներն իրականացրել են թմրանյութերի միջազգային հսկողական մատակարարում:
Ձերբակալվածի խուզարկության ժամանակ ոստիկանությունն առգրավել է «Ալֆա-ՊՎՊ» թմրանյութ, մեֆեդրոն և «Ալֆա-ՊՎՊ» մուլյաժ՝ որպես իրեղեն ապացույց։
Քրեական գործ է հարուցվել «Թմրանյութերի, դրանց համարժեքների կամ նոր հոգեմետ նյութերի ապօրինի պատրաստում, արտադրում, ձեռքբերում, պահպանում, փոխադրում, առաքում կամ իրացում» հոդվածով, որը «պատժվում է մինչև 6 տարի ժամկետով ազատազրկմամբ»: