ՀՀ վարչապետի պաշտոնակատար Նիկոլ Փաշինյանն այսօր եզրափակիչ ելույթի ժամանակ արձագանքեց «Լուսավոր Հայաստան» խմբակցության ղեկավար Էդմոն Մարուքյանի այն դիտարկմանը, թե գործող իշխանությունը շեղվել է այն սկզբունքներից, որն ուներ, երբ «Ելք» դաշինքի կազմում խորհրդարանում ծավալում էր ընդդիմադիր գործունեություն:
Փաշինյանը հայտարարեց, որ իրենց իշխանությունը միշտ գնացել է հայտարարված արժեքների հետևից, ի տարբերություն իրենց գործընկերների. ««Ելք» դաշինքի նախընտրական ցուցակում եղել է 20 տոկոս համահարթ եկամտահարկի սահմանում: Մեր գործընկերներն այդ փոփոխությանը դեմ են քվեարկել: Կարևորագույն դրույթներից մեկն էլ եղել է համամասնական ընտրակարգի անցնելը, ես հիշում եմ, որ այն ժամանակ, երբ ԱԺ-ում քննարկվում էր համամասնական ընտրակարգի անցնելու տարամաբանությունը, և երբ մեր հարգելի գործընկերները ցույց էին տալիս իրենց սկզբունքայնությունը, համացանցում հայտնվեցին հայտնի ելույթների հայտնի կտորներ, որտեղ մարդիկ ավելի սկզբունքային էին... Էս թվարկումը կարելի է երկար շարունակել, բայց, կարծում եմ, այս երկու օրինակը բավարար է»,- ասաց Փաշինյանը: