Ռուսաստանը մտադիր չէ միանալ G7 ձևաչափին, Մոսկվայի մասնակցությամբ «Մեծ ութնյակ» չի լինի, РИА Новости-ին տված հարցազրույցում հայտարարել է Ռուսաստանի արտգործնախարար Սերգեյ Լավրովը:
«Մենք բազմիցս ասել ենք, որ այլևս երբեք չենք միանա նրանց։ Այդ «ութնյակն» այլևս չի լինելու, դա անցյալում է»,-ասել է նախարարը։
Նա նշել է, որ ձևաչափի մասնակիցների խոսակցությունները, թե չեն ցանկանում Ռուսաստանին ձևաչափի մեջ ներգրավել, պետք են միայն տպավորություն ստեղծելու համար, թե «հավատարիմ են մնում իրենց վճռական խոսքին»։
«Մեծ ութնյակի» ձևաչափը գոյություն է ունեցել 1998-ից մինչև 2014 թվականը, բայց վերածվել է G7-ի, երբ Ղրիմի շուրջ իրադարձությունների պատճառով ձևաչափի մասնակիցները հրաժարվել են մասնակցել Սոչիում կայանալիք հերթական գագաթնաժողովին, այլ հավաքվել են Բրյուսելում՝ առանց Ռուսաստանի: