ԱՄՆ-ի, Կանադայի, Լիտվայի, Լեհաստանի և Մեծ Բրիտանիայի ներկայացուցիչները խորհրդակցություն են անցկացրել և քննարկել Ուկրաինայի սահմանների մոտ Ռուսաստանի ռազմական ակտիվության աճը: Հանդիպումը, որին մասնակցել են Միացյալ Նահանգների պաշտպանության փոխնախարարի պաշտոնակատար Ամանդա Դորին և ՆԱՏՕ-ի նշված անդամ երկրների գործընկերներն, անցկացվել է առցանց ձևաչափով: Այս մասին հայտնում է Պենտագոնի կայքը։
Ինչպես հաղորդվում է, խորհրդակցության մասնակիցները քննարկել են իրենց անհանգստացնող հարցերը՝ տարածաշրջանում Ռուսաստանի ռազմական ակտիվության ավելացման վերաբերյալ:
Նշվում է, որ նրանք նաև «հաստատել են իրենց անվերապահ աջակցությունն Ուկրաինայի ինքնիշխանությանը, նրա տարածքային ամբողջականությանն ու եվրատլանտյան ձգտումներին»:
Պենտագոնի հայտարարության մեջ նաև ընդգծվում է, որ «Ռուսաստանի ապակայունացնող գործողությունները խաթարում են լարվածության թուլացումը, որը ձեռք է բերվել ԵԱՀԿ-ի միջնորդությամբ 2020 թվականի հուլիսի 27-ի համաձայնագրով»: