ԱԺ ԼՀԿ խմբակցության պատգամավոր Անի Սամսոնյանը ֆեյսբուքյան իր էջում գրել է․ «Այսօր Կառավարական 3-րդ մասնաշենքի մոտ տեղի ունեցած բողոքի գործողությունների ընթացքում ՀՀ Ոստիկանությունը անհամաչափ ուժ է կիրառել քաղաքացիների նկատմամբ։ Ոստիկանները կոպտորեն հրել են մեկ լրագրողի և գցել գետնին։ Բռնի ուժ է կիրառվել ՀՅԴ ԳՄ ներկայացուցիչ Իշխան Սաղաթելյանի նկատմամբ՝ վերջինիս պատճառելով մարմնական վնասվածք, որի հետևանքով նաև՝ ուղեղի ցնցում։
Ոստիկանների գործողությունների հետևանքով կոտրվել է նաև ակցիայի մասնակիցներից մեկի՝ ՀՅԴ անդամ Ռազմիկ Արաբյանի ոտքը, նրա մոտ ախտորոշվել է ձախ սրունքի սալջարդ:
Ավելի ուշ երեկոյան փողոցում ակցիա իրականացնող քաղաքացիների կողմից հարձակման են ենթարկվել Ազատություն ռադիոկայանի լրագրողը և օպերատորը՝ իրենց մասնագիտական աշխատանքը կատարելիս։ Նրանց հարվածել են ոտքերով և հայհոյել։
Կոչ եմ անում ՀՀ ոստիկանապետին այսօրվա իրադարձությունները դարձնել խիստ քննության առարկա՝ ոչ համաչափ գործելաոճը բացառելու նպատակով։
Խիստ դատապարտում եմ լրագրողների նկատմամբ հարձակումները, թե՛ ոստիկանության ծառայողների և թե՛ ակցիայի մասնակիցների կողմից։ Որևէ մեկը իրավունք չունի խոչընդոտել լրագրողների աշխատանքը, ցուցաբերել խտրական վերաբերմունք, առավել ևս հարձակում գործել նրանց նկատմամբ։
Քաղաքացիների նկատմամբ ոչ իրավաչափ գործողություններով բռնի ուժ կիրառած ոստիկանների նկատմամբ պետք է իրականացվի ծառայողական քննություն, մարմնական վնասվածք պատճառելու դեպքերով՝ քրեական վարույթներ։
Լրագրողների նկատմամբ հարձակում գործած քաղաքացիները անխուսափելիորեն պետք է ենթարկվեն պատասխանատվության։
Եվս մեկ անգամ հիշեցնում եմ, որ ոստիկանները պետք է ապահովեն քաղաքացիների՝ խաղաղ ակցիաներ իրականացնելու իրավունքը, իսկ քաղաքացիները կարող են իրենց հավաքների իրավունքը իրացնել միայն բացառապես առանց բռնության և անօրինական գործողությունների։
Ավելի ամփոփ տեղեկատվություն դեռ կներկայացնենք»։
