Համացանց

«Մեկ Հայաստան» կուսակցության քաղխորհրդի անդամ, էներգետիկ մասնագետ Վահե Դավթյանը ֆեյսբուքյան իր էջում գրել է. «Խաչատուր Սուքիասյանին պատկանող «ՍԻԼ»-ը գնել է Հայաստանի նավթամթերքի շուկայի հնաբնակ RUN OIL ընկերությունը:
     Հաշվի առնելով այն, որ Սուքիասյանը հանդիսանում է գործող վարչակազմի ֆավորիտը, ակնհայտ է, որ գործարքը երկարաժամկետ ու բավականին հավակնոտ նպատակներ է հետապնդում: Այդ նպատակներից, թերևս, ամենակարևորը հայաստանյան նավթամթերքի շուկայում առանցքային ներկրողի կարգավիճակում կայանալն է՝ իջեցնելով նախկին իշխանությունների հետ ուղիղ աֆիլացման մեջ մեղադրվող «ՖԼԵՇ»-ի ու City Petrol Service-ի կշիռն ու ազդեցությունը:
     Գործարքի կողմերը, սակայն, մի բան չեն հաշվարկել: Հայաստանում սպասվող իշխանափոխությունից հետո բոլոր քաղաքական պայմանավորվածությունները հօդս են ցնդելու: Արդյունքում «ՍԻԼ»-ի կողմից ձեռքբերված RUN OIL-ը, լավագույն դեպքում, դիրքավորվելու է որպես երկրորդական նշանակության ներկրող կամ էլ պարզապես որպես բենզալցակայանների ցանց՝ միաժամանակ զբաղվելով նաև «Գազպրոմնեֆտի» շարժիչային յուղի ու հակասառեցման հեղուկի վաճառքով:
     Վատ չէ, իհարկե: «ՍԻԼ»-ն ընդլայնվում է, դիվերսիֆիկացնում է բիզնեսը:
     Պարզ է, սակայն, որ վարչակազմի քիմքին հաճո նոր «ՖԼԵՇ»-ի ստեղծման ծրագրերն ի սկզբանե կարող ենք ձախողված համարել»: