Խնդրում ենք սպասել...

Թերթերի տեսություն

Ի՞նչ տուգանք է սպասվում գնված ապրանքը հետ չվերցնելու դեպքում. օրենքը կփոխվի. «Ժողովուրդ»

10:00, չորեքշաբթի, 17 փետրվարի, 2021 թ.
Ի՞նչ տուգանք է սպասվում գնված ապրանքը հետ չվերցնելու դեպքում. օրենքը կփոխվի. «Ժողովուրդ»

«Ժողովուրդ» օրաթերթը գրում է. «ՀՀ տարածքային կառավարման և ենթակառուցվածքների նախարարությունն առաջարկում է փոփոխություններ կատարել Վարչական իրավախախտումների վերաբերյալ օրենսգրքում:

Օրինակ՝ առաջարկվում է Վարչական իրավախախտումների վերաբերյալ ՀՀ 1985 թվականի դեկտեմբերի 6-ի օրենսգրքի 158-րդ հոդվածի 36-37-րդ մասերը շարադրել նոր խմբագրությամբ:

Այսպես, տնտեսավարող սուբյեկտի ղեկավարի կամ նրան փոխարինող պաշտոնատար անձի կողմից հսկողության իրականացման աշխատանքների ընթացքին խոչընդոտելը կամ տեսուչների օրինական պահանջներն ու ցուցումները չկատարելը առաջացնում է տուգանքի նշանակում` 500 հազար դրամից մինչև1 մլն դրամի չափով։

Իսկ, ահա, առևւտրի օբյեկտներում գնորդին վաճառված պատշաճ որակի ոչ պարենային ապրանքները օրենքով սահմանված ժամկետում և օրենքով սահմանված դեպքերում չփոխարինելը և հետ չվերցնելը կամ հետ վերցնելուց և փոխարինելուց հրաժարվելու մասին հայտարարություն փակցնելը կառաջացնի տուգանքի նշանակում` 50 հազար դրամից մինչև 100 հազար դրամի չափով:

Իսկ մինչ այս նկատենք, որ ոչ պարենային ապրանքների խանութներ կան, որտեղ ոչ միայն հետ չեն ընդունում ապրանքը, այլև մինչեւ գնելը սպառողին զգուշացնում են, որ իրենց «ներքին կանոններով» չեն կարող հետ ընդունել ապրանքը, ծայրահեղ դեպքում առաջարկում են փոխանակել նույն գինն ունեցող մեկ այլ ապրանքով: Հուսանք` տնտեսվարողները օրենքի այս փոփոխությունից կզգոնանան և, ի վերջո, կսկսեն հարգել ու հաշվի նստել սպառողի իրավունքների հետ»:

Ավելի մանրամասն՝ այսօրվա համարում։

4273 | 0
Facebook