Առողջապահության համաշխարհային կազմակերպության (ԱՀԿ) փորձագետները չեն բացառում, որ նոր տեսակի կորոնավիրուսը Չինաստանի տարածքում սկսել է տարածվել 2019 թվականի հոկտեմբերին, այլ ոչ թե դեկտեմբերին: Այս մասին հայտնել է The Wall Street Journal թերթը՝ հղում անելով համաշխարհային կազմակերպության ներկայացուցիչներին։ Թերթի տվյալներով՝ ԱՀԿ-ի միջազգային առաքելության փորձագետներին հաջողվել է պարզել, որ 2019 թվականի հոկտեմբերին Կենտրոնական Չինաստանի տարածքում հոսպիտալացվել է 92 մարդ՝ այն ախտանշաններով, որոնք նման են կորոնավիրուսի հարուցած հիվանդությանը: Առողջապահության ոլորտի չինացի մասնագետները հետագայում կատարել են այդ հիվանդների՝ կորոնավիրուսի նկատմամբ հակամարինների առկայության թեստավորում, որը բոլոր դեպքերում բացասական արդյունք է ցույց տվել:
ԱՀԿ-ի փորձագետներն իրենց հերթին կարծում են, որ անցկացված թեստերի արդյունքները կարող են չարտացոլել իրական պատկերը, քանի որ ժամանակի ընթացքում հիվանդների մոտ հակամարմինների պարունակության մակարդակը կարող է իջնել այն աստիճանի, որը հնարավոր չէ բացահայտել:
«Անհրաժեշտ է լրացուցիչ հետազոտություններ անցկացնել»,- թերթը մեջբերել է կենդանախտային վարակների (որոնք մարդուն են փոխանցվում կենդանիներից) և պարենային անվտանգության գծով միջազգային փորձագիտական խմբի ղեկավար Փիթեր Բեն Էմբարեքի խոսքը:
Ինչպես նշում է The Wall Street Journal-ը, ԱՀԿ-ի մասնագետները Չինաստանի իշխանություններին համապատասխան հարցում են ուղարկել՝ 2019 թվականի հոկտեմբերին Կենտրոնական Չինաստանում հոսպիտալացված հիվանդներից վերցված արյան նմուշների լրացուցիչ ստուգում անցկացնելու նպատակով: