Ջութակահար Նարեկ Սարգսյանը ֆեյսբուքյան իր էջում գրել է. «Լևոն Արոնյանի շուրջ ստեղծված իրավիճակի մասին պարտքս եմ համարում ասել հետևյալը:
Արոնյանը ոչ միայն Հայաստանի լավագույն շախմատիստն է, այլ իր նվաճուներով արդեն իսկ մտել է մեր սպորտի պատմության մեջ: Հիշենք միայն օլիմպիական երեք ոսկիները, որ անկախ Հայաստանի սպորտի ամենամեծ նվաճումներից են: Արոնյանը հայկական սպորտի սիմվոլներից է:
Երեկ Լևոն Արոնյանի մայրը ընդարձակ մանրամասներ էր ներկայացրել՝ նկարագրելով մի շարք անընդունելի փաստեր: Եթե կան խնդիրներ, այդ խնդիրների լուծումը ոչ թե հեռանալն է, այլ դրանց մասին հրապարակային խոսելը:
Որովհետև որևէ երկիր չի կարելի նույնացնել իր իշխանությունների հետ: Բոլոր իշխանություններն էլ անցողիկ են, բայց Հայաստանը մնայուն է, Հայաստանի պատիվը, սպորտային պատմությունը մնայուն է:
Եթե Լևոն Արոնյանը երբևէ հանդես գա այլ երկրի դրոշի ներքո, դա հսկայական բարոյական հարված կլինի նախ մեր երկրի սպորտային պատվին և ապա մեր ողջ ժողովրդի, հատկապես Արոնյանին տարիներ շարունակ սրտանց երկրպագող բազմահազար շախմատասերների արժանապատվությանը:
Առանձնահատուկ հաջողությունների հասած մարզիկները արժանի են առանձնահատուկ վերաբերմունքի և Արոնյանը, լինելով առանձնահատուկ հաջողություններ ունեցող մարզիկ, լիուլի իրավունք ունի պահանջելու և ստանալու այդպիսի վերաբերմունք:
Եթե իշխանությունները սեփական խելքով չեն ֆայմում մեր լավագույն մարզիկի հետ վարվել այնպես, որ մարզիկն իրեն գնահատված զգա, ապա այդ հարցը ունի պարզ լուծում – խնդիրը պետք է հրապարակայնացնել: Եթե Արոնյանը հրապարակավ հայտարարի. «Ես Լևոն Արոնյանն եմ, ինձ համար անընդունելի է այս-այս-այս վերբերմունքը», նույնպահին իրենց սխալ պահող պետական այրերը շատ խելոք կկատարեն իրենց պարտականությունները, իսկ մեր ժողովուրդը մի մարդու նման կաջակցի Արոնյանին: Չլուծվող հարց չկա:
Միգուցե մեր սպորտային իշխանությունները ապիկար են և արժանի են վատ վերաբերմունքի, բայց Հայաստանը արժանի չէ վատ վերաբերմունքի: Հայաստանը արժանի է, որ իր լավագույն մարզիկները պաշտպանեն իր դրոշի գույները մինչև մարզական կարիերայի վերջին օրը: