Ամերիկյան բանակում ծառայող կանանց կթույլատրեն հարդարել մազերը, շատ կարճ սանրվածքներ անել, ականջօղեր կրել, ինչպես նաև ներկել շուրթերն ու եղունգները: Այս մասին գրում է The Hill-ը։
Փոփոխությունները կկատարվեն ծառայողների արտաքին տեսքի պահանջների մեջ՝ հատուկ հանձնաժողովների հանձնարարականների հիման վրա։
«Սա այն միջոցներից մեկն է, որով մենք աշխատում ենք բարելավել մեր զինվորների կյանքը` մարդկանց առաջին տեղում դնելով, հասկանալով նրանց խնդիրներն՝ անհրաժեշտության դեպքում գործողություններ ձեռնարկելով»,- ասել է գեներալ-լեյտենանտ Գարի Բրիթոն:
Նրա խոսքով՝ բանակի քաղաքականությունը պետք է աջակցի ներառականությանն ու հավասարությանը։