«Պետք է տեղի ունենան կատարվածի պատճառների վերհանման, ստուգման աշխատանքներ և հայ հանրությունը պետք է ստանա հստակ պատասխաններ, թե ինչ է տեղի ունեցել և ինչու։ Ժողովուրդը պետք է հասու լինի ճշմարտությանը և որոշումներ կայացնելու հնարավորություն ունենա։ Ըստ այդմ, մեր ամենակարևոր անելիքը ՀՀ քաղաքացիների՝ սեփական երկրի և իրավիճակի տերը լինելու զգացողության և փաստի պահպանումն է»,- այսօր կառավարության նիստի իր խոսքում ասաց ՀՀ վարչապետ Նիկոլ Փաշինյանը։
«ՀՀ քաղաքացին պետք է վստահ լինի, որ ինքն է իրավիճակի տերը և այս զգացողության վրա պետք է կառուցի իր ապագան։ Նաև ժողովուրդը պետք է որոշի, թե այդ ապագան ում հետ պետք է կառուցի, և այդ ապագայի կառուցման գործում ով՝ ինչպիսի դերակատարություն պիտի ունենա»,- շարունակեց վարչապետն ընդգծելով․ «Մենք չպիտի թույլ չտանք, որ այդ ապագայի նկատմամբ հավատը սպանվի և մեր ամենօրյա աշխատանքը պետք է ուղղված լինի այդ հավատի ամրապնդմանը, ուժեղացմանը և հզորացմանը»։