Լեռնային Ղարաբաղի հակամարտության գոտում կան ահաբեկչական կազմակերպությունների գրոհայիններ Մերձավոր Արևելքից: Այս մասին հայտնել է ՌԴ Արտաքին հետախուզության ծառայության ղեկավար Սերգեյ Նարիշկինը: Տեղեկությունը հրապարակվել է ծառայության պաշտոնական կայքում:
«Մեր ունեցած տեղեկություններով՝ հակամարտության գոտում առկա են վարձկաններ Մերձավոր Արևելքի մի շարք ահաբեկչական խմբավորումներից, ինչպիսիք են՝ «Ջաբհաթ ան-Նուսրան», «Ֆիրկաթ Համզան», «Սուլթան Մուրադը», ինչպես նաև քրդական ծայրահեղական խմբավորումներ: Ավելին՝ խոսքը հարյուրավոր, նույնիսկ հազարավոր ծայրահեղականների մասին է, որոնք ցանկանում են գումարներ վաստակել նոր պատերազմում»,- նշվում է հաղորդագրությունում:
Նարիշկինը հայտնել է նաև, որ Հարավային Կովկասը կարող է դառնալ հարյուրավոր ահաբեկիչների համար նոր ցատկահարթակ: