Խնդրում ենք սպասել...

Իրադարձություններ

«Անթույլատրելի ենք համարում Վ. Ավետիսյանի թեկնածության առաջադրումը». Մարտի 1-ի գործով տուժածների հայտարարությունը

18:25, շաբաթ, 25 հուլիսի, 2020 թ.
«Անթույլատրելի ենք համարում Վ. Ավետիսյանի թեկնածության առաջադրումը». Մարտի 1-ի գործով տուժածների հայտարարությունը

Մարտի 1-ի գործով քաղբանտարկյալները և զոհերի հարազատները հայտարարություն են տարածել Վահրամ Ավետիսյանին ՍԴ դատավորի թեկնածու առաջադրելու մասին:

«ՀՀ կառավարությունը առաջադրել է Վահրամ Ավետիսյանի թեկնածությունը Սահմանադրական դատարանի դատավորի պաշտոնում։ Այս լուրը դարձել է հասարակական լայն քննարկման առարկա, քանի որ առաջադրված թեկնածուի հայրը 2008-2016թթ պաշտոնավարել է ՀՀ Վճռաբեկ դատարանի քրեական պալատի նախագահի պաշտոնում։

Վահրամ Ավետիսյանի թեկնածության առաջադրումը և դրա հետևանքով առաջացած դժգոհությունը կիսում ենք նաև մենք` 2008 թ.-ի քաղբանտարկյալներս և մարտիմեկյան ոճրագործության զոհերի իրավահաջորդները։

Ուստի, դիմում ենք ՀՀ կառավարությանն ու Ազգային ժողովին և հայտարարում, որ անթույլատրելի ենք համարում Վահրամ Ավետիսյանի թեկնածության առաջադրումն ու հաստատումը, գլխավորապես երկու պատճառով.

1. 2008 թ.-ին Հայաստանում Սահմանադրական կարգը տապալելու միջոցով իշխանությունը զավթած խումբը, իր վերահսկողության տակ առնելով ամբողջ դատական իշխանությունը, ձեռնամուխ եղավ նաև 2008-ի համաժողովրդական շարժման ակտիվիստներին և առաջնորդներին ապօրինի վճիռներով բանտերում պահելու հանցավոր գործընթացին։ Քննչական մարմինների և դատախազության այն ժամանակվա ղեկավարներ Անդրանիկ Միրզոյանի և Աղվան Հովսեփյանի հանձնարարությամբ «կարված» շինծու մեղադրանքները կալանքի որոշման և մեղադրական դատավճռի էին վերածվում տասնյակ դատավորների մուրճի հարվածով, և ապա` վերջնականապես հաստատվում Վճռաբեկ դատարանի քրեական պալատում, որի նախագահն էր այսօր կառավարության կողմից հաստատված թեկնածուի հայրը՝ Դավիթ Ավետիսյանը։

Մարտիմեկյան ոճրագործության և դրա հետ կապված հարյուրավոր մարդկանց ապօրինի հետապնդումների հարցերը արդեն իսկ դարձել են Հայաստանի դատական ատյանների, ընդհուպ` Սահմանադրական դատարանի քննության առարկա: Աներկբա է, որ քննության արդյունքում, ի թիվս այլոց, պատասխանատվության պետք է ենթարկվի նաև Վճռաբեկ դատարանի քրեական պալատի երբեմնի նախագահ Դավիթ Ավետիսյանը: Ուստի, անթույլատրելի է, որ վերջինիս հետ փոխկապակցված անձ և մերձավոր ազգական հանդիսացող Վահրամ Ավետիսյանը որևէ կարգավիճակով ուղղակի կամ միջնորդավորված մասնակցություն ունենա այդ գործերի քննությանը: Ակներև է նաև, որ Վահրամ Ավետիսյանի ընտրության պարագայում, Սահմանադրական դատարանում երկարաժամկետ կտրվածքով գործ ենք ունենալու շահերի ակնհայտ բախման երևույթի հետ, ինչը կասկածի տակ է դնելու առնվազն մարտիմեկյան ոճրագործությանն առնչվող գործերի հնարավոր քննության լեգիտիմությունը:

2. «Սահմանադրական դատարանի մասին» ՀՀ օրենքի 4-րդ հոդվածի 1-ին մասով Սահմանադրական դատարանի դատավորին ներկայացվող պահանջների ցանկում սահմանված է նաև, որ Սահմանադրական դատարանի դատավոր կարող է ընտրվել բարձր բարոյական որակներով անձնավորությունը: Համոզված ենք, որ այդպիսի պահանջն օրենքում տեղ է գտել` նկատի ունենալով Սահմանադրական դատարանի բացառիկ դերը երկրի պետական-հասարակական կյանքում և նշանակում է ընդամենը մեկ բան` Սահմանադրական դատարանի դատավորն իր գործունեությամբ, աշխարհայացքով և կենսագրությամբ պետք է լինի բարոյական հեղինակություն հասարակության համար: Մինչդեռ, հայ հասարակությունը Վահրամ Ավետիսյանի անունն առաջին անգամ լսեց կառավարության նիստի ժամանակ: Հատկանշական է նաև, որ Պետական համալսարանի քաղաքացիական իրավունքի ամբիոնի վարիչը երբևէ հրապարակայնորեն չի դատապարտել թե մարտիմեկյան ոճրագործությունը, թե ավազակապետական համակարգի գործունեությունը, ինչպես նաև չի արտահայտել իր դիրքորոշումը հանրային կյանքում նշանակալի որևէ այլ երևույթի կամ իրադարձության վերաբերյալ: Ուստի, կառավարության մոտ պետք է որ հիմնավոր կասկած առաջանար Վահրամ Ավետիսյանի անաչառության և արդարամտության առումով:

Հիմք ընդունելով վերոշարադրյալը, կոչ ենք անում Կառավարությանը` առաջնորդվելով Հայաստանում լիակատար արդարադատություն հաստատելու և հասարակության վստահությունը ամբողջապես վայելող Սահմանադրական դատարան ձևավորելու` ստանձնած հանձնառությամբ, հետ կանչել Վահրամ Ավետիսյանի առաջադրումը, հակառակ դեպքում, դիմում ենք Ազգային ժողովի պատգամավորներին` այս հարցում դրսևորել առավելագույն բծախնդրություն` մերժելով Վահրամ Ավետիսյանի թեկնածությունը:

Միևնույն ժամանակ, համարում ենք, որ հեղափոխական իշխանությունը պետք է պատասխանատվության ենթարկի 2008 թ-.ին, դրանից առաջ և հետո քաղաքական հետապնդումների մասնակից դարձած դատավորներին, մաքրի դատական համակարգը այդպիսիներից և զերծ պահի բոլոր այն անձանցից, ովքեր որևէ առնչություն են ունեցել Սահմանադրական կարգը տապալելուն կամ օժանդակել են այդ ծանր հանցագործությանը։ Ակնկալում ենք նաև, որ արագացված կարգով պետք է արդարացվեն ապօրինի հետապնդումների և դատավճիռների ենթարկված բոլոր անձինք:

1. Հակոբ Հակոբյան

2. Գրիգոր Ոսկերչյան

3. Լևիկ Խաչատրյան

4. Վահագ (Վարդգես) Հայոցյան

5. Աշոտ Մանուկյան

6. Արամ Բարեղամյան

7. Արշակ Բանուչյան

8. Հարություն Ուռուտյան

9. Տիգրան Բաղդասրյան

10. Հովհանես Հարությունյան

11. Վլադիմիր Առաքելյան

12. Ժորա Սափեյան

13. Մկրտիչ Սափեյան

14. Ռուբիկ Ոսկանյան

15. Շոթա Սաղաթելյան

16. Սամսոն Խաչատրյան

17. Սամվել Հարությունյան

18. Աշոտ Թադևոսյան

19. Աղասի Մկրտչյան

20. Մելիք Գրիգորյան

21. Կարեն Թարխանյան

22. Խաչիկ Գասպարյան

23. Արեգ Գևորգյան

24. Հովհաննես Ղազարյան

25. Մասիս Այվազյան

26. Դավիթ Առաքելյան

27. Ֆելիքս Գևորգյան

28. Իսահակ Մալխասյան

29. Մկրտիչ Աբրահամյան

30. Վարդան Ղավալբաբունց

31. Դավիթ Քիրամիջյան

32. Վահե Ղազարյան

33. Տիգրան Մկրտչյան

34. Գևորգ Ղազարյան

35. Լևոն Խաչատրյան

36. Տիգրան Մելքոնյան

37. Ալբերտ Ներսիսյան

38. Սարգիս Գևորգյան

39. Տիգրան Առաքելյան

40. Արտակ Կարապետյան

41. Մարզպետունի Այվազյան

42. Անդրանիկ Սափեյան

43. Հայկ Գեւորգյան

44. Ռաջու Պետրոսյան

45. Սողոմոն Երիցյան

46. Արման Շահինյան

47. Շմավոն Գալստյան

48. Գաբրիել Գաբրիելյան

49. Յաշա Մելքոնյան

50. Դավիթ Մաթևոսյան

Մարտի 1-ի զոհերի հարազատներ՝

1. Սարգիս Քլոյան

2. Վաչագան Ֆարմանյան

3. Էդիկ Հարությունյան

4. Հովսեփ Խաչատրյան

5. Ռուզան Հարությունյան

6. Վարդուհի Գևորգյան

7. Լիլա Հովհաննիսյան

8. Մայրամ Հովհաննիսյան

4528 | 1
Facebook