Իրադարձություններ

Երևանի զարգացման 2019 թվականի ծրագրի հաշվետվության քննարկան ժամանակ Երևանի ավագանու «Լույս» խմբակցության ղեկավար Դավիթ Խաժակյանն անդրադառնալով իրականացվող ասֆալտապատման աշխատանքներին, հարցով դիմեց քաղաքապետ Հայկ Մարությանին․ «Ուսումնասիրելով գնումների գործընթացը, տեղեկացել եմ, որ գնման մրցույթ հայտարարված չէ, բայց ինչ-որ կազմակերպություններ ասֆալտապատում են անում․․․ կարծում եմ քաղաքապետի համաձայնությամբ։ Ի՞նչ հիմունքներով է սա իրականացվում։ Հետո այդ մարդկանց աշխատանքներն ինչպե՞ս ենք վճարելու, թե՞ ուղղակի գիտենք, որ իրենք են հաղթելու, դրա համար ասել ենք՝ դու հիմա աշխատանքը արա, հետո կանդրադառնանք»։

Հ․ Մարությանին վրդովվեցրեց Խաժակյանի հարցը․ «Պարոն Խաժակյան, այդպիսի բաներ տեղի էին ունեում Ձեր կողմից շատ սիրված Վահե Նիկոյանի և Տարոն Մարգարյանի ժամանակ և տարբեր քաղաքապետերի ու փոխքաղաքապետերի ժամանակ։ Միգուցե Դուք կուզենայիք լինել փոխքաղաքապետ, որ այդպիսի բաներ կատարվեր, բայց քանի ես եմ քաղաքապետը, այդպիսի բաներ չի կարող կատարվել»։

Պատասխանելով քաղաքապետին՝ «Լույս»-ի ղեկավարն ասաց, որ վիրավորական է լսել նման արտահայտություններ քաղաքապետից․ «Դուք ինձ վիրավորական բաներ եք ասում, ես չեմ պատրաստվում լսել»։ Նա հավելեց, որ քաղաքապետը միգուցե անտեղյակ է ամեն ինչից․ «Ես հավաստիացնում եմ՝ որքան սիրում եմ Վահե Նիկոյանին, Տարոն Մարգարյանին, այնքան էլ Ձեզ եմ սիրում»,- ասաց Խաժակյանը։

Քաղաքապետը վերջինին հորդորեց այդ սերը պահել իրեն, հատկապես, երբ երկրում արտակարգ դրություն է։ Նա նշեց՝ քանի դեռ ինքն է Երևանի քաղաքապետը, անօրինական գործողություններ չեն կարող լինել։