ԱՄՆ այցի ընթացքում Բրազիլիայի նախագահ Ժաիր Բոլսոնարուն և նրան ուղեկցող պատվիրակությունը նոր կորոնավիրուսի թեստ են հանձնել, երբ նախագահի պատվիրակության բարձրաստիճան պաշտոնյայի մոտ հաստատվել է վարակը: Այս մասին հաղորդել է G1 պարբերականը:
Լրատվամիջոցի տեղեկություններով՝ բացի նախագահից, ով մարտի 21-ին կդառնա 65 տարեկան, թեստ է հանձնել նրա 37-ամյա կինը՝ Միշելը, ինչպես նաև նրա որդիներից մեկը՝ դաշնային պատգամավոր Էդուարդու Բոլսոնարուն: Ստուգում են անցել նաև պաշտպանության նախարարը` Ֆերնանդու Ազվեդոու-ի-Սիլվան, պետական անվտանգության ղեկավարը` Աուգուստու Հելենուն: Բրազիլիայի արտաքին գործերի նախարար Էռնեստու Արաուժուն, ով դեռ չի վերադարձել Միացյալ Նահանգներ ուղևորությունից, նույնպես ստուգվելու է վարակի ախտորոշման համար և 14 օր կանցկացնի կարանտինում։
Արդյունքները պատրաստ կլինեն այսօրվա ընթացքում: Մինչ այդ պետության ղեկավարին խորհուրդ է տրվել չհեռանալ պաշտոնական նստավայրից:
Նշենք, որ ՀՀ վարչապետի տիկին Աննա Հակոբյանն օրերս է վերադարձել Բրազիլիայից, ուր հանդիպել էր Բրազիլիայի առաջին տիկնոջ հետ ու նրան հրավիրել Հայաստան։