Համացանց

Քաղաքագետ Գևորգ Գալստյանը ֆեյսբուքյան իր էջում գրել է. «Չեմ կարծում, որ ոստիկանական համակարգը կառուցվածքային փոփոխությունների ենթարկելը կբարձրացնի դրա արդյունավետությունը, առավել ևս չեմ կարծում, որ կառուցվածքային փոփոխությունը կարող է փոխել ոստիկանի և ոստիկանության հանդեպ հայ հասարակությունում գերակշռող և, ինչ-որ չափով, կարծրացած վերաբերմունքը: Հատկապես ոստիկանությունը ՀՀ-ի այն հիվանդ օրգանիզմներից է, որի բուժման ամենաարդյունավետ միջոցը կլինի վերադարձն ազգային գաղափարախոսության հիմքերին: Այս համատեքստում կարևոր է նշել, որ «ոստիկանապետի տեղակալին» կամ «տեղակալի տեղակալին» ոստիկանության ղեկավար նշանակելով, ոստիկանական համակարգն իր դիրքերն ավելի կամրապնդի անդունդում: Եթե կա ոստիկանության և ոստիկանի հանդեպ հասարակությունում դրական վերաբերմունք ձևավորելու իրական ցանկություն, ապա հարկավոր է ոստիկանության ղեկավարումը հանձնել ազգային գիտակցությամբ սպայի, որի փնտրտուքների տիրույթը կարելի է նաև ընդարձակել: Եթե ձգտում եք ոստիկանի վրայից վերջնականապես մաքրել «ցույց ցրողի» պիտակը, կրթեք կամ վերակրթեք նրան ազգային գաղափարների հիմքով: Եվ դա կլինի ամենահեղափոխական քայլերից մեկը, որ կարելի է երբևէ պատկերացնել»: