Միջազգային

Ամերիկացի լեգենդար դերասան Քըրք Դուգլասը մահացել է ԱՄՆ-ի Բևեռլի Հիլզ քաղաքում՝ 103 տարեկան հասակում: Այս մասին հաղորդել է Քըրք Դուգլասի որդին` հայտնի դերասան Մայքլ Դուգլասը։
     «Քըրք Դուգլասն ամբողջ աշխարհի համար լեգենդ էր, կինեմատոգրաֆի «ոսկե դարի» ներկայացուցիչ»,- գրել է հանգուցյալի որդին: Մայքլը կարևորել է այն ժառանգությունը, որը հայրը թողել է ապագա սերունդներին:

     Քըրք Դուգլասը, ում իրական անունը` Իսեր Դանիելովիչ է, կինոյում հայտնի է բազմաթիվ դերերով, որոնցից ամենահայտնիներից են Վինսենթ Վան Գոգի և Սպարտակի դերերը:
     Ամերիկյան կինոակադեմիան իր կողմից հրապարակված ամերիկյան բոլոր ժամանակների ֆիլմերի 100 մեծագույն աստղերի ցանկում նրան ընդգրկել է 17-րդ տեղում, 1996-ին նա ստացել է Օսկար մրցանակ կինեմատոգրաֆում ունեցած բացառիկ նվաճումների համար: Խաղացել է ընդհանուր թվով 90-ից ավելի գեղարվեստական և հեռուստատեսային ֆիլմերում ու սերիալներում։