Միացյալ Նահանգները չի նախատեսում իր զորքերը դուրս բերել Իրաքից: Այս մասին երկուշաբթի հայտարարել է ԱՄՆ պաշտպանության նախարար Մարկ Էսպերը:
«Իրաքը լքելու որոշում չկա»,- նշել է Էսպերը, գրում է Reuters-ը: Էսպերը մեկնաբանել է մի շարք լրատվամիջոցների կողմից նախկինում տարածված տեղեկությունը, այդ թվում` Reuters գործակալության, որ ԱՄՆ-ի գլխավորած միջազգային հակաահաբեկչական կոալիցիան հայտարարել է Իրաքից զորքերը դուրս բերելու որոշման մասին:
Պենտագոնի խոսնակ Ալիսա Ֆարահը նաև նշել է, որ ԱՄՆ-ն չի փոխում իր ծրագրերն Իրաքում և պահպանում է իր ներկայությունը: «Մենք կշարունակենք խորհրդակցել Իրաքի կառավարության հետ՝ իրաքյան անվտանգության ուժերին աջակցելու հարցում»,- գրել է Ֆարահը Twitter միկրոբլոգի իր էջում: