Ուեյք Ֆորեսթի համալսարանի գիտնականներն իրենց հետազոտության արդյունքում ապացուցել են, որ բազուկը կարող է դառնալ սրտանոթային հիվանդությունների և զարկերակային բարձր ճնշման բուժման արդյունավետ միջոց: Բազուկում առկա կալիումի ու մագնիումի համադրությունն այնպիսին է, որ շատ օգտակար է սրտանոթային, քրտնարտադրության և միզահեռացման համակարգերի աշխատանքի համար:
Բազուկը նաև պարունակում է սրտի աշխատանքը բարելավող նյութեր՝ շնորհիվ վիտամին В9-ի համադրության, որը կանխարգելում է սրտային հիվանդությունները: Այն նաև բարձրացնում է հեմոգլոբինի մակարդակը, կանխում սակավարյունությունը:
Մասնագետները նաև հավելել են, որ բազուկն օգտակար է ինչպես թարմ, այնպես էլ՝ եփած կամ շոգեխաշած վիճակում: Սակայն այն մարդիկ, ովքեր ունեն թույլ մարսողություն կամ ստամոքսի բարձր թթվայնություն, պետք է բազուկ ուտեն զգուշավորությամբ: