Միջազգային

Բրիտանիայում դեկտեմբերի 12-ին անցկացված արտահերթ խորհրդարանական ընտրություններում, էքզիթ փոլի արդյունքներով, առաջատարը Պահպանողական կուսակցությունն է՝ վարչապետ Բորիս Ջոնսոնի գլխավորությամբ: Արտահերթ ընտրությունների արդյունքների հիման վրա Համայնքների պալատի 650 տեղերից 368-ը կզբաղեցնի Պահպանողական կուսակցությունը, որը կայուն մեծամասնություն է կազմելու: Պահպանողականների հիմնական մրցակիցները՝ Լեյբորիստական կուսակցությունը՝ Ջերեմի Կորբինի գլխավորությամբ, կստանա 191 տեղ, ինչը սպասվածից քիչ է։ Լիբերալ դեմոկրատական կուսակցությունը՝ 13 տեղ, Շոտլանդիայի ազգային կուսակցությունը՝ 55, Ուելսի կուսակցությունը՝ 3, Կանաչները՝ 1։ Բացի այդ, ըստ կանխատեսումների, Համայնքների պալատում կլինեն 19 անկախ պատգամավորներ։