Խնդրում ենք սպասել...

Համացանց

«Եթե հանրայնացնեմ իմ և Էլոյանի «ջերմ» խոսակցությունները, իր վիճակն ավելի ծանր կլինի». Սարհատ Պետրոսյան

00:25, երեքշաբթի, 12 նոյեմբերի, 2019 թ.
«Եթե հանրայնացնեմ իմ և Էլոյանի «ջերմ» խոսակցությունները, իր վիճակն ավելի ծանր կլինի». Սարհատ Պետրոսյան

Կադաստրի կոմիտեի նախկին ղեկավար Սարհատ Պետրոսյանը ֆեյսբուքյան իր էջում գրել է. «Իհարկե, կասկած չունեմ որ Հանրային հեռուստատեսությունում (և հուսով եմ միայն Հանրային հեռուստատեսությունում) ակտիվ շարունակում են քննարկել, թե ե՞րբ են ինձ կանչում իրենց եթեր պատասխանելու համար Պետրոս Ղազարյանին ու Ավետիք Էլոյանին։ Հատկապես նշում եմ Պետրոսի անունը, քանի որ մի քանի անգամ հարց է տալիս՝ ինձ մեջբերելով, իրականում հարցնելով մի բան, որը ես կա՛մ չեմ ասել (ինչու մրցույթ չի եղել), կա՛մ էլ ասել եմ, բայց ոչ Ավետիքի վերաբերյալ (թայֆայականություն)։

Ինչևէ, չնայած արդեն ինչ-որ նյութեր ներկայացվել են տարբեր հանրային, այդ թվում և իրավապահ, մարմինների, սակայն փորձեմ «ճեղքել» Հանրային հեռուստաընկերության մեդիա պատնեշն ու ներկայացնեմ մի քանի հետաքրքիր փաստեր։

Ավետիք Էլոյանը 2012 թվականին եղբոր՝ Զարեհ Էլոյանի հետ ԱՄՆ-ում բացել է Eloyan Architects նախագծային կազմակերպությունը, որի պաշտոնական կայքում կա միայն մեկ բնակարանի ինտերիերի նախագիծ Հայաստանում (հարցազրույցում խոսքը գնում է մի քանիսի մասին)։ Ենթադրում եմ, որ ամենայն հավանականությամբ, Զարեհը չունի նախագծման իրավունք ԱՄՆ-ում, բայց ամեն դեպքում ընդունում ենք կայքի տվյալները։ Ավետիքը Հայաստան է եկել 2018-ի մայիսին կամ հունիսին և նշանակվել ՀՀ քաղաքաշինության կոմիտեի նախագահ, իսկ աշխատանքից ազատվել է 2019-ի սկզբին՝ անմիջապես նշանակվելով փոխվարչապետ Տիգրան Ավինյանի խորհրդական։ Քաղաքաշինության կոմիտեի նախագահ նշանակվելու պատճառով նույն կայքի առաջին էջում (չհիշեցնեմ ում հորդորով) նշված է, որ այսուհետ Eloyan Architects-ը պատվերներ չի ընդունում Հայաստանում։ Սա գրեցի, քանի որ կարծում եմ՝ ապագայում դեռ պետք կգա, որը վկայում է շահերի բախման մասով ամեն դեպքում կան ինչ-որ պատկերացումներ։

2019 թվականի մայիսին Հայաստանում գրանցվում է նույն անունով կազմակերպություն՝ այս անգամ եղբոր՝ Զարեհ Էլոյանի անունով, իհարկե, այն կարող է լինել զոքանչի կամ վարորդի անունով։

Այս կարճ ընթացքում նորաստեղծ ընկերությանը պատվիրակվում է Հայաստանի անկախության շրջանի խոշորագույն նախագծերից, իսկ այս պահին իրականացվող ամենախոշոր նախագիծը՝ շվեցարահայ Վարդեն Սերմաքեշի կողմից իրականացվող ավելի քան 60 հա տարածքով նոր քաղաք Աբովյան քաղաքի հարևանությամբ։ Ի դեպ՝ թե՛ սա, թե՛ Սերմաքեշի մի շարք ներդրումային ծրագրերը համակարգում է փոխվարչապետ Տիգրան Ավինյանի գրասենյակը։

Համաձայն օդում կախված լուրերի՝ Eloyan Architects-ն այժմ ներգրավված է նաև նոր ֆուտբոլային ստադիոնի, Դալմայի տարածքում բազմահարկ բնակելի թաղամասի և մի շարք այլ նախագծերում (հատուկ Պետրոսի համար նշեմ որպես նախագծող, այլ ոչ որպես ֆինանսական ներդրող)։ Դրան ավելացնենք հանրահայտ 70 հարկանի շենքի նախագիծը, որն ինչպես ներկայացվում է հարցազրույցում, պատվիրվել է 2017-ի վերջին։ Չնայած այս պնդումն արժանահավատ չի, սակայն եթե կարելի է ապացուցել, որ դա պատվիրվել է մինչ նշանակումն, ապա այս նախագծի մասով կարծում եմ, կկարողանանք հանգիստ լինել (ավելին ներողություն խնդրել), բայց միևնույնն է, մնում է այն հարցը, թե ինչպես է մեր լավագույն ինտերիեր դիզայներներից Զարեհ Էլոյանը շարունակելու այս աշխատանքն առանց «փորձառու» Ավետիք Էլոյանի։

Ինչ վերաբերում է աշխատողների քանակին, ապա օգոստոսին կազմակերպությունն ունեցել է ութ աշխատող (Էլոյանն ասում է չորս), որի մեջ, ենթադրաբար, չի մտնում ինքը՝ Ավետիք Էլոյանը ու բազմաթիվ այլ outsource մասնագետներ։

Ամենահետաքրքիրն այն է, որ 2019 թվականի հուլիսին, համաձայն քաղաքաշինության կոմիտեի կայքի, Հայաստանի Eloyan Architects-ը չուներ նախագծման լիցենզիա, իսկ ինչքան ինձ է հայտնի, Ավետիք Էլոյանն անձամբ նախագծման արտոնագիր ստացել է 2019 թվականի հոկտեմբերին՝ ինձ հետ միասին։ Այսինքն, եթե այլ փաստեր չեն ներկայացվում, ապա կարող ենք պնդել, որ ինչ-որ մեկը Eloyan Architects-ից զբաղվել է անօրինական նախագծային գործունեությամբ։ Բայց սա էլ թողնենք ապագային։

Հարցազրույցի մյուս մասերում ևս հնչել են մտքեր, որոնց ես դեռ կանդրադառնամ։

Ի դեպ, Ավետիքին առաջարկում եմ, ապագայում չնշի մեր նախկին ջերմ հարաբերությունների մասին, քանի որ դեռ մինչ այս պահը ես բարձրաձայնում եմ միայն բաց ու շատերին հայտնի փաստերը, իսկ եթե ես սկսեմ նաև հանրայնացնել իմ և իր «ջերմ» խոսակցություններն ու հորդորները, ինչպես նաև այլոց հետ խոսակցություններն ու որպես Կադաստրի կոմիտեի ղեկավար հրապարակման ենթակա տեղեկություններն, ապա իր վիճակը շատ ավելի ծանր կլինի։ Կարծում եմ, նա դեռ շանս ունի՝ ուղղակի հրաժարական տալով ներկա պաշտոնից, շարունակել աշխատել, որպես սովորական շարքային ճարտարապետ։ Դրանով նա միայն օգնած կլինի Տիգրան Ավինյանին, քանի որ իր անպատասխանատու պահվածքի համար, վերջիվերջո, Ավինյանն է հարվածի տակ հայտնվում։

Դեռևս այսքանը, սպասեք ավելիին…»:

3420 | 1
Facebook