«Սիրիայի ժողովրդավարական ուժերի» ղեկավար Ալդար Խելիլը հայտարարել է, որ քրդական ուժերը դրական են գնահատել Միացյալ Նահանգների և Թուրքիայի միջև ձեռք բերված համաձայնությունը՝ դադարեցնել Սիրիայում «Խաղաղության աղբյուր» գործողությունը, գրում է Regnum գործակալությունը՝ հղում անելով Al-Arabiya-ն: Ավելի վաղ, Թուրքիայի նախագահ Ռեջեփ Թայիփ Էրդողանը բանակցություններ է վարել ԱՄՆ փոխնախագահ Մայք Պենսի հետ: Բանակցությունները տևել են չորս ժամ: Ըստ արդյունքների` Պենսը հայտարարել է, որ Թուրքիան համաձայնել է դադարեցնել կրակը Սիրիայի հյուսիս-արևելքում 120 ժամ տևողությամբ: Այս ընթացքում սիրիական քրդական կազմավորումները պետք է տեղափոխվեն «անվտանգ գոտի»:
30 կմ երկարությամբ «անվտանգ գոտի»-ն կլինի Թուրքիայի և Սիրիայի սահմանին: Բացի այդ, Պենսը հայտարարել է, որ ԱՄՆ-ի զինված ուժերը չեն վերադառնա այս գոտի: