Իրադարձություններ

Շրջակա միջավայրի նախարար Էրիկ Գրիգորյանը կառավարության նիստից հետո լրագրողների հետ ճեպազրույցում անդրադարձել է իր՝ «Լիդիան Արմենիա» ընկերության հետ ունեցած առնչությունների հարցին:

«Հանքարդյունաբերական որևէ կազմակերպության համար երբևէ չեմ աշխատել, թեպետ բազմաթիվ առաջարկներ եմ ունեցել: Տարիներ առաջ՝ 2014-15թթ. որպես խորհրդատու աշխատել եմ բրիտանական մի կազմակերպությունում: Այն վերլուծություններ է կատարում հանքարդյունաբերական ընկերությունների համար: Եղել է, որ արել եմ Զանգեզուրի պղնձամոլիբդենայինի համար, եղել է Լիդիանի համար եմ արել, Ագարակի պղնձամոլիբդենայինի համար, բայց որևէ մեկի հանդեպ պարտավորություն չեմ ունեցել»,- նշել է նախարարը:

Հիշեցնենք, որ տեղեկատվական հարթակներում լուրեր էին տարածվել, թե Շրջակա միջավայրի նախարարն առնչություններ ունի «Լիդիան Արմենիա» ընկերության հետ և իր գործունեությամբ դրա շահերն է պաշտպանում: Այդ պնդումները նախարարը ծիծաղելի է որակել: