«Եթե դուք վաղը մյուս օրը դառնաք վարչապետ, ինքներդ եք սահմանափակված լինելու օրենսդրությամբ». Տարոն Սիմոնյան
 «Քանի որ ներքին ինֆորմացիա ավելի քիչ կարող եմ իմանալ, քան ինքը՝ կառավարությունը, բնականաբար կառավարությունն ինքը կարող է փաստարկներն ավելի լավ ներկայացնել: Բայց այն, ինչ մենք տեսնում ենք այսօր որպես քաղաքական վերահսկողություն իրրականացնող մարմին, միանշանակ փաստում ենք, որ խորը և հիմնարար փոփոխությունների է ենթակա և՛ ազգային անվտանգության համակարգը, և՛ ոստիկանությունը:Եթե դուք վաղը մյուս օրը դառնաք վարչապետ, ինքներդ եք սահմանափակված լինելու օրենսդրությամբ, որովհետև բավականին լուրջ խնդրի առջև ենք կանգնել՝ վերափոխել անվտանգության համակարգը»: ԱԺ սեպտեմբերի 13-ի նիստում հայտարարեց «Լուսավոր Հայաստան» խմբակցության պատգամավոր Տարոն Սիմոնյանը՝ իր գործըկերոջ՝ Արման Բաբաջանյանի այն հարցին ի պատասխան, թե կարելի՞ է ենթադրել, որ կան փաստարկված տեղեկություններ, որ այսօր և՛ ազգային անվտանգության ծառայությունում, և՛ ոստիկանությունում գործող կարգը չի բավարարում համակարգին, և այն անհրաժեշտ է փոխել: Իսկ փոփոխությունը «Լուսավոր Հայաստան» խմբակցության ներկայացրած այն նախագիծն է, որով առաջարկվում է ոստիկանության պետի և ազգային անվտանգության տնօրենի պաշտոնները հանել համապատասխանաբար ոստիկանության պաշտոնների և ազգային անվտանգության մարմինների ծառայողների պաշտոնների անվանացանկերից՝ ներառելով դրանք քաղաքական պաշտոնների անվանացանկում և նրանց համար ևս կիրառել Սահմանադրության 148-րդ հոդվածի 1-ին մասի սահմանումը, որի համաձայն՝ կառավարության անդամը պետք է բավարարի պատգամավորին ներկայացվող պահանջները: Ներկա օրենսդրությամբ՝ Ազգային անվտանգության ծառայության տնօրեն կարող է նշանակվել ազգային անվտանգության մարմինների այն ծառայողը, ով մինչև նշանակումն զբաղեցրել է ազգային անվտանգության մարմինների ծառայողների բարձրագույն խմբի պաշտոն կամ առնվազն 3 տարի զբաղեցրել է գլխավոր խմբի պաշտոն և ունի գնդապետից ոչ ցածր կոչում, իսկ ոստիկանության պետ կարող է նշանակվել ոստիկանության այն ծառայողը, որը մինչև նշանակումը զբաղեցրել է ոստիկանության բարձրագույն կամ առնվազն 3 տարի գլխավոր խմբի պաշտոն և ունի ոստիկանության գնդապետից ոչ ցածր ոստիկանության կոչում: Ըստ նախագծի հեղինակների՝ ստացվում է, որ այս կարևոր ուժային կառույցների ղեկավարներին պետության ղեկավարը կաշկանդված է նշանակելու նույն համակարգում ծառայություն անցած անձանց շրջանակից, ինչն անընդունելի է: «Իմ քայլից» Արթուր Հովհաննիսյանն էլ նկատեց, թե դրանով քաղաքականացնում ենք այդ պաշտոնները, և հնարավոր է, որ հետագայում իշխող ուժի ճաշակով պայմանավորված նման ուժային կառույցներ ունենանք, մինչդեռ ԱԱԾ մարմինները պետք է անկախություն ունենան: «Եթե այդ նախագիծը ներկայացներ իշխող քաղաքական ուժը ներկայացներ, ինչպե՞ս կվերաբերվեիք».-հարցրեց Ա. Հովհաննիսյանը: Տ. Սիմոնյանն ասաց, որ ինքը դրական կարձագանքեր, եթե նման առաջարկությամբ հանդես գար իշխանական խմբակցությունը, որովհետև առաջարկն ինստիտուցիոնալ է: «Այդ առումով հավասար վերաբերմունք պետք է արտահայտենք բոլոր ուժային կառույցների նկատմամբ: Ունենք ՊՆ, որն անկախ է, քաղաքական գործընթացներին չի մասնակցում, ունի քաղաքական պատասխանատու անձ, որը նախարարն է, բայց մնացած կառույցները, որ նույն տրամաբանության մեջ են, նման պատասխանատու անձ չունեն» -հիմնավորեց պատգամավորը: |
