ԱՄՆ նախագահ Դոնալդ Թրամփը հայտարարել է, որ թալիբների ներկայացուցիչների հետ Աֆղանստանում բանակցությունները խաղաղ կարգավորման վերաբերյալ «մեռած են»: Այս մասին Թրամփը հայտնել է լրագրողներին՝ դեպի Հյուսիսային Կարոլինա թռիչքից առաջ, հայտնում է Reuters-ը:
Թրամփը նաև հայտնել է, որ չեղարկել է թալիբների պատվիրակների և Աֆղանստանի նախագահ Աշրաֆ Ղանիի հետ հանդիպումը, որը պետք է կայանար սեպտեմբերի 8-ին Մերիլենդի նահանգում գտնվող Քեմփ Դևիդի նախագահական ամառանոցում:
Նրա խոսքով՝ Միացյալ Նահանգները շարունակում են դիտարկել Աֆղանստանից զորքերը դուրս բերելու հնարավորությունը, բայց կանեն դա, երբ կգա ճիշտ ժամանակը:
«Մենք կցանկանայինք հեռանալ, բայց կհեռանանք ճիշտ ժամանակին»,-հավելել է Թրամփը:
Թրամփի որոշումը կապված է Քաբուլում սեպտեմբերի 5-ին տեղի ունեցած ահաբեկչական գրոհի հետ, որի հետևանքով զոհվեց 12 մարդ, այդ թվում ամերիկացի զինվոր: