Իրադարձություններ

Այսօր հրավիրած ասուլիսում ավագանու ԲՀԿ խմբակցության անդամները քննարկում էին երևանցիներին հուզող խնդիրները, Մարկոս Հարությունյանը պատմեց, որ քաղաքային իշխանության մեղքով ի չիք եղավ Աջափնյակ վարչական շրջանի վթարային շենքերի բնակիչներին նոր բնակարաններով ապահովելու ծրագիրը: Ըստ դրա՝ կառուցապատող մի ընկերություն և քաղաքապետարանը եկել էին համաձայնության, որ16 հարկանի շենք կառուցելու թույլտվություն ստանալու դիմաց կառուցապատող ընկերությունը պետք է նորակառույցից բնակարաններ տրամադրեր վթարային շենքերի բնակիչներին:

«Սակայն քաղաքապետարանն այնքան չխառնվեց կառուցապատող և բնակիչներ հարաբերություններին, որ ի վերջո, կառուցապատողը հրաժարվեց նախկին պայմանավորվածությունից»,- նշեց Մարկոս Հարությունյանը: Այս խնդրի հանգուցալուծման, ինչպես նաև առհասարակ վթարային շենքերի հարցի լուծման վերաբերյալ քաղաքապետարանից ստացել է հետևյալ պատասխանը՝ այս խնդիրը քաղաքային իշխանության լուծելու խնդիրը չէ:

Ավագանու ԲՀԿ խմբակցության անդամները չբացառեցին, որ առաջիկայում հանդես կգան ժամանակավոր հանձնաժողով ստեղծելու նախաձեռնությամբ: Նպատակը թունաքիմիկատների խնդրով զբաղվելն է: Բանն այն է, որ մասնագետների շրջանում կա տարաձայնություն՝ Երևանում մե՞կ, թե՞ 2 գերեզմանոց կա: Նշվում է, որ մեկն օրինական է, մյուսը՝ ոչ: Իսկ թունաքիմիկատների պատճառած վնասը ծանրակշիռ է: Տարիներ շարունակ նշվել է, որ թունավոր նյութերը հասնում են մինչև Արարատյան դաշտ՝ դրանից բխող բացասական հետևանքներով: