Հայաստանի սպառողների ազգային ակադեմիայի նախագահ Մելիտա Հակոբյանը հուլիսի 31-ին լրագրողների հետ հանդիպմանը կրկին խոսեց աղբահանության մասին, սակայն փոքր-ինչ այլ համատեքստում: Ըստ նրա՝ քաղաքի սանիտարական վիճակը սարսափելի է, առնետներն արդեն սկսել են ազատ՝ առանց մարդկանցից վախենալու շրջել փողոցներով ու բակային տարածքներով, դա իր մեջ մեծ վտանգ է պարունակում:
Քանի որ Հայաստանը ժանտախտ հիվանդության էնդեմիկ օջախ է, իսկ հիվանդության տարածողները հենց առնետներն են, ապա եթե հիվանդության դեպքեր արձանագրվեն, դրա բուժման հարցում խնդիրներ ենք ունենալու:
«Այսօր բժշկական համալսարանը չունի սանիտարահիգիենայի ֆակուլտետ: Այսինքն՝ եթե Աստված մի արասցե, ժանտախտի դեպք արձանագրվի, մենք պրոֆիլակտիկ ոչինչ չենք կարողանալու անել: Չունենք նորավարտ ինֆեկցիոնիստներ, էպիդեմիոլոգներ, հատուկ վտանգավոր ինֆեկցիաների բժիշկներ: Դրա մասին թող մտածեն»,- ահազանգեց մասնագետը: