Ութ կողմ և մեկ դեմ քվեարկությամբ այսօր ԲԴԽ նախագահ ընտրվեց Ռուբեն Վարդազարյանը:
Նա լրագրողների հետ զրույցում նշեց, որ Քոչարյանի գործը քննող դատավոր Դավիթ Գրիգորյանի աշխատասենյակի խուզարկության առնչությամբ ԲԴԽ-ն որևէ խոչընդոտ չի նկատել. «Դրա համար հատուկ հրավիրել ենք Դավիթ Գրիգորյանին, որպեսզի նա ներկայացնի ստեղծված իրավիճակը, որից հետո արդեն կկողմնորոշվենք»,- նշեց նա:
Վարդազարյանը հայտարարեց, որ կանի հնարավոր ամեն ինչ՝ լիովին ապահովելու համար դատավորների անկախությունը:
«Իմ համոզմամբ ԲԴԽ-ն պետք է լինի թափանցիկ, նրա գործողությունները պետք է լինեն տրամաբանված և հասկանալի, դրանով հենց կապահովվի դատավորների անկախությունը»:
Հարցին, թե ինքը տեսնո՞ւմ է կապեր կամ ազդեցություն ԲԴԽ-ում նախկին իշխանությունների կողմից, նորընտիր նախագահը պատասխանեց. «Բացարձակ չեմ տեսնում նախորդ իշխանության հետ կապեր ԲԴԽ-ում»: