«Վենետիկյան կրքերի» մասով Նիկոլ Փաշինյանը հայտարարությամբ հանդես կգա
 Վերջին 2-3 օրերին Հայաստանի ներքաղաքական պայքարի կիզակետում է հայտնվել Վենետիկի հանձնաժողովը, ավելի ճշգրիտ՝ հանձնաժողովի 116-րդ նիստի աշխատանքային արձանագրությունը: Սկզբնական շրջանում փորձ արվեց հանրության մոտ տպավորություն ստեղծել, թե Վենետիկի հանձնաժողովը դժգոհ է հայաստանյան իրադարձություններից, հետո պարզվեց, որ շրջանառության մեջ է դրվել մի փաստաթուղթ, որը պաշտոնապես ուղղված չէ Հայաստանի իշխանություններին: Այդ համատեքստում շրջանառվեց Վարդան Պողոսյանի անունը: Կատարվածը, ըստ էության, անակնկալ էր ՀՀ իշխանությունների համար: ՀՀ վարչապետի մամուլի քարտուղար Վլադիմիր Կարապետյանը NEWS.am-ի հետ զրույցում նշել էր, որ իրենք դեռ պետք է հասկանան, թե խորհրդապահական բնույթի փաստաթուղթն ինչպես է հայտնվել լրատվամիջոցների էջերում։ Պետք է հարցեր ուղղեն Հայաստանի ներկայացուցիչներին Վենետիկի հանձնաժողովում և լրջագույնս հետևություններ անեն՝ հասկանալու համար, թե ինչպես է այդ ամենը հրապարակվել: MAMUL.am-ը Վլադիմիր Կարապետյանին հարցրեց՝ «լրջագույնս հետևություններ անել» ասվածը ենթադրո՞ւմ է Վենետիկի հանձնաժողովում ՀՀ ներկայացուցչի փոխարինում, եթե այո, որո՞նք են այն մեխանիզմները, որոնցով պետք է տեղի ունենա փոխարինումը: Վարչապետի մամուլի քարտուղարը դժվարացավ պատասխանել հարցին՝ նշելով, որ դա դեռ պարզաբանման կարիք ունի: «Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանը MAMUL.am-ի հետ զրույցում հիշեցրեց, որ Վարդան Պողոսյանը Գագիկ Հարությունյանին փոխարինողն է: «Վարդան Պողոսյանն այն մարդն է, որ Հրայր Թովմասյանի հետ գրել է այն թյուրիմացությունը, որը հետո դարձել է ՀՀ Սահմանադրություն: Թյուրիմացություն՝ սկսած ՍԴ անդամ-դատավոր սահմանումից՝ վերջացրած բազմաթիվ այլ տեխնիկական թերություններով»: MAMUL.am-ը ՀՀ ներկայացուցչի հնարավոր փոխարինման հարցի պատասխանը որոնեց Վենետիկի հանձնաժողովի կանոնադրության մեջ: Ըստ այդմ՝ այնտեղ նշված է. «Հանձնաժողովի յուրաքանչյուր մասնակից երկիր հանձնաժողովում նշանակում է մեկ փորձագետ (և կարող է նշանակել այն անձին, որն անհրաժեշտության դեպքում նրան փոխարինում է) չորս տարի ժամկետով: Փորձագետները պետք է աշխատեն որպես անկախ մասնագետներ, այլ ոչ թե պետությունների ներկայացուցիչներ: Հանձնաժողովի անդամները կարող են փոխարինվել միայն այն դեպքում, եթե նրանք հրաժարական են տվել, կամ եթե հանձնաժողովը նշում է, որ նշված անդամն այլևս ի վիճակի չէ, կամ այլևս չունի բավարար որակավորում իր պարտականությունները կատարելու համար»: Վարդան Պողոսյանը «տեղավորվո՞ւմ» է այս բանաձևի մեջ, դժվար է ասել: Նրա գործունեության 4 տարին ըստ էության չի լրացել: Տեսականորեն մնում է կամ սեփական կամքով հրաժարական ներկայացնելը, կամ էլ այն տարբերակը, որ «փակ» համարվող փաստաթուղթը հրապարակայնացնելը հանձնաժողովը դիտարկի պարտականությունները կատարելու համար բավարար որակավորման բացակայություն, և անդամը փոխարինվի: Հարցի պատասխանը կտան ՀՀ իշխանությունները: Ըստ մամուլի քարտուղար Վ.Կարապետյանի՝ ՀՀ վարչապետը խոստացել է հանդես գալ հայտարարությամբ: Իսկ Վենետիկի հանձնաժողովը հրապարակած հայտարարությամբ հաստատեց, որ բեղմնավոր է գնահատում Հայաստանի իշխանությունների հետ աշխատանքը և դատական բարեփոխումների առնչությամբ կարծիք կներկայացնի, երբ պատրաստ կլինեն ՀՀ դատական օրենսգրքի փոփոխությունները: |
