Հարցազրույցներ

Իսպանիայի Պոնտեվերդա քաղաքում կայացած ըմբշամարտի Եվրոպայի երիտասարդական առաջնությունում Հայաստանը ներկայացնող 72 կգ քաշային հունահռոմեական ոճի ըմբիշ Մալխաս Ամոյանը հռչակվեց Եվրոպայի չեմպիոն։ Սա երիտասարդ մարզիկի առաջին ոսկե մեդալն է Եվրոպայի երիտասարդական առաջնությունում։ Մինչ այս Ամոյան-կրտսերը երկու բրոնզե մեդալ էր նվաճել Եվրոպայի երիտասարդական առաջնություններում։ Մալխասն իր տպավորություններով կիսվեց MAMUL.am-ի թղթակցի հետ․ «Զգացմունքներս անբացատրելի են։ Շատ ուրախ եմ, որ կարողացա ոսկե մեդալ նվաճել։ Հավատում էի, որ մեդալ կնվաճեմ, բայց հավատալը քիչ է։ Ցանկության, աշխատասիրության և ճիշտ մարզվելու շնորհիվ հնարավոր է հասնել հաղթանակի»։

Մալխասն առաջնությունում մեկնարկել էր որակավորման փուլից՝ տոնելով 4 հաղթանակ: Ամենատպավորիչը, թերևս, կիսաեզրափակչում վերջին վայրկյաններին ռուս մրցակցի դեմ գոտեմարտում 5։4 հաշվով տոնած հաղթանակն էր. «Ամեն գոտեմարտն իր դժվարությունն ունեցավ։ Մեծ ցանկությանս և մարզիչներիս խորհուրդների շնորհիվ կարողացա հաղթել։ Հաղթանակս նվիրում եմ փոքրիկ եղբորս՝ Դավթին՝ հունիսի 4-ին կայացած ծննդյան օրվա կապակցությամբ»։