Վենեսուելայի նախագահ Նիկոլաս Մադուրոն ԱՄՆ նախագահ Դոնալդ Թրամփին մեղադրել է Վենեսուելայի էլեկտրացանցերի վրա հարձակում կատարելու մեջ: «Գլխավոր պատասխանատուն Թրամփն է: Նա ասել է, որ բոլոր տարբերակները հնարավոր են ու դա այժմ կրկնում են նրա խամաճիկներն ու ծաղրածուները: Այդ հնարավորություններից մեկն էլ էլցանցերի վրա հարձակումն էր»,- հայտարարել է Մադուրոն:
Հիշեցնենք՝ Վենեսուելայի մայրաքաղաք Կարակասը և մի շարք նահանգներ հինգշաբթի հոսանքազրկվել էին: Էլեկտրաէներգիայի անջատումներ էին եղել երկրի մոտ 23 նահանգներում:
Հաջորդ օրն էլեկտրաէներգիայի մատակարարումը վերականգնվել էր, սակայն շաբաթ օրը կրկին անջատվել էր` նահանգներից մեկի էլեկտրակայանում տեղի ունեցած պայթյունի հետևանքով: