Կառավարության առջև այսօր բողոքի ցույց են իրականացրել 1996 թվականին դաժանաբար սպանված Իոսիֆ Աղաջանովի հարազատները՝ պահանջելով ներում չշնորհել Աղաջանովի սպանության համար ցմահ ազատազրկման դատապարտված Մհեր Ենոքյանին։
«Մենք դեմ ենք հրեշի ազատմանը: Եթե մարդը 20 տարեկանում ունակ է նման բանի, նա իրավունք չունի հասարակության անդամ լինել», - նշում էին ակցիայի մասնակիցները:
Բողոքի ակցիային ներկա էին Իոսիֆ Աղաջանովի հայրը, առողջապահության նախկին նախարար Արմեն Մուրադյանը, Արցախի նախկին օմբուդսմեն Ռուբեն Մելիքյանը և շատ այլ հայտնի մարդիկ։
Նշենք, որ օրեր առաջ ստորագրահավաք էր իրականացվել, որով հանրապետության 800-ից ավելի բժիշկներ դեմ էին արտահայտվել Մհեր Ենոքյանի հնարավոր ազատ արձակմանը։
Ակցիայի մասնակիցները նշեցին, որ ՀՀ վարչապետ Նիկոլ Փաշինյանից ակնկալում են դրական պատասխան: