ԱՄՆ-ն սկսել է Սիրիայից ռազմատեխնիկայի առաջին խմբաքանակի դուրսբերման գործընթացը, տեղեկացնում է CNN-ը՝ հղում անելով ԱՄՆ նախագահի վարչակազմի ներկայացուցիչներին:
«Որոշակի խմբաքանակ արդեն դուրս է բերվել»,- հայտնել է աղբյուրը: Ընդ որում, նա չի հստակեցրել, թե ինչ խմբաքանակի մասին է խոսքն ու ինչ ճանապարհով է այն դուրս բերվել՝ օդային, թե՝ ցամաքային:
Ինչպես նաև Միացյալ Նահանգների իշխանությունները չեն հստակեցրել, թե կոնկրետ որ հատվածում էր այդ խմբաքանակն օգտագործվում, սակայն լրագրողները ենթադրել են, որ այն օգտագործվում էր Սիրիայի հյուսիսում:
Բացի այդ, ԱՄՆ-ի իշխանությունները հրաժարվել են Սիրիայից ամերիկյան զորքի դուրսբերման հստակ ժամանակահատված սահմանել: Ինչպես նշել է ԱՄՆ նախագահի ազգային անվտանգության հարցերով խորհրդական Ջոն Բոլթոնը՝ դա պայմանավորված է ԴԱԻՇ ահաբեկչական խմբավորման ակտիվացման հետ կապված մտահոգություններով և քրդական միավորումների անվտանգությունն ապահովելու ցանկությամբ: Միևնույն ժամանակ, Պենտագոնը պարտավոր է զորքերի դուրսբերման հրամանն արձակած նախագահ Թրամփին այդ հարցում որևէ առաջընթացի ապացույց ներկայացնի: