2018թ. ընթացքում իրենց մասնագիտական պարտքը կատարելիս սպանվել է 94 լրագրող, 12-ով ավելի շատ, քան նախորդ տարի, հաղորդում է DW-ը՝ հղում անելով լրագրողների միջազգային ֆեդերացիային (IFJ):
Նշվում է, որ լրագրողների համար ամենավտանգավոր երկիրն Աֆղանստանն է, որտեղ մամուլի 16 ներկայացուցիչ է սպանվել:
11 լրագրող է սպանվել Մեքսիկայում հարձակումների հետևանքով, 9-ը՝ Եմենում և 8-ը՝ Սիրիայում:
Եվրոպայում՝ Ֆրանսիայում, Բուլղարիայում, Թուրքիայում և Սլովակիայում, 4 լրագրող է սպանվել:
Ֆեդերացիայի ներկայացուցչի խոսքով՝ զոհերի թիվը ցույց է տալիս աշխարհում լրագրողների համար անվտանգության ցածր մակարդակը:
IFJ-ի տվյալներով՝ աշխարհում 1990-ից ի վեր ավելի քան 2500 լրագրող է սպանվել: Ամենավտանգավոր երկիր է համարվում Իրաքը, որտեղ ավելի քան 300 լրագրող է սպանվել:
Ամենաաղմկահարույց սպանությունը ֆեդերացիան անվանում է սաուդցի լրագրող Ջամալ Խաշոգջիի սպանությունը:
Միևնույն ժամանակ, Լրագրողներ առանց սահմանների կազմակերպությունը հայտնել է, որ դեկտեմբերի կեսերի դրությամբ աշխարհում 80 լրագրող է զոհվել, ևս 348 լրագրող կալանքի տակ է մնում: