Մինչև ընթացիկ մրցաշրջանի ավարտը «Մանչեսթր Յունայթեդ»-ի գլխավոր մարզչի ժամանակավոր պաշտոնակատար է նշանակվել նորվեգացի Ուլե Գունար Սուլշերը։ Նրա մարզչական շտաբում կաշխատեն Մայքլ Ֆելանը, Մայքլ Կերիկը և Կիրան ՄքՔեյնը:
««Մանչեսթր Յունայթեդ»-ն իմ սրտում է, և այստեղ վերադառնալը հիանալի է: Անհամբերությամբ եմ սպասում անհավանական տաղանդավոր ֆուտբոլիստների հետ աշխատանքին, որոնք այժմ այս թիմում են, ինչպես նաև մարզչական շտաբի և ակումբի մյուս աշխատակիցների հետ համագործակցության մեկնարկին»,- նշել է Սուլշերը։
Նշենք, որ Սուլշերը 1996-ից 2007 թվականներին հանդես է եկել «Մանչեսթր Յունայթեդ»-ի կազմում, որի հետ 6 անգամ դարձել է Անգլիայի չեմպիոն, երկու անգամ Անգլիայի գավաթակիր, հաղթել է Չեմպիոնների լիգայի խաղարկությունում, երկու անգամ ճանաչվել է Անգլիայի սուպերգավաթի և Միջմայրցամաքային գավաթի հաղթող: